هەرێم نیوز
ئاسایشی هەولێر ڕایگەیاند، لەلایەن باندێكی بازرگانیكردنەوە هەوڵدرابوو بڕی 25 کیلۆ ماددەی هۆشبەر بە شێوەی شاراوە بهێنرێتە شاری هەولێرەوە.
بەڕێوەبەرایەتی ئاسایشی هەولێر لە ڕاگەیەندراوێکدا ڕایگەیاند، دوای ئەنجامدانی بەدواداچوون و کۆکردنەوەی زانیاری، دەستمان گرت بەسەر بڕی ( 25 کیلۆ و 5 گرام) ماددەی هۆشبەر لە جۆری کریستال.
ئەوەشی خستەڕوو، ئەم ماددە هۆشبەرە لەلایەن باندێکی بازرگانیکردن بە ماددەی هۆشبەر بە ڕێگای کۆمپانیایەکی گواستنەوە بەشێوەیەکی شاراوە لەناو دوو بۆڕی ئاسن حەشار درابوو و دەربازی شاری هەولێریان کردبوو.
باسی لەوەشکرد، بازرگانەكان بۆ حەشاردانی ئەم ماددە هۆشبەرە بە جۆرێک لە دەرمانی قڕکردنی مێروو سەرەوەی ئەو بۆڕییە ئاسنە ڕووپۆش کرابوو بۆ ئەوەی ئاشکرانەبێت و لەلایەن (سەگی k9) نە بینرێتەوە.
ئاشکراشیکرد، بە فەرمانی دادوەری لێکۆلینەوەی ئاسایشی هەولێر ڕێکاری یاسای بەرامبەر ئەو کۆمپانیای گواستنەوە گیراوەتە بەر.