هەرێم نیوز
دادگای تایبەتی ڕۆحانییەکانی ئێران چوار مامۆستای ئایینی لە ڕۆژهەڵاتی کوردستان بەتۆمەتی جۆراوجۆر و بەگشتی بۆ یانزە ساڵ سزادەدات.
بەگوێرەی هەواڵی پێگەی کوردپا، دادگای تایبەتی ڕۆحانییەکان لە شاری ورمێ، هەر یەک لە مامۆستایان(مامۆستا یونس نوخا،مامۆستا شەریف محەممەدپوور، مامۆستا سلێمان ئەحمەدی،مامۆستا جەمالەدین واژەی) کە هەر چواریان خەڵکی شاری پیرانشاری ڕۆژهەڵاتی کوردستانن، بەتۆمەتی وەکو؛ دژایەتی ئەمنییەتی نەتەوەیی، فریودانی ڕای گشتی، واژۆکردنی بەیاننامەی مامۆستایانی بۆ پشتیوانی لە جووڵانەوەی ژن ژیان ئازادی و پاشان بەتۆمەتی بەشداریکردن لە خۆپیشاندانەکان سزادراون.
سزای ئەو مامۆستایانەش بەمشێوەیەیە، یونس نوخا بە سێ ساڵ،شەریف محەممەدپوور بە چوار ساڵ و هەر یەک لە سلێمان ئەحمەدی و جەمالەدین واژی بە دوو ساڵ سزادراون.
دادگای تایبەتی ڕۆحانییەکان لقێکە لە دەسەڵاتی دادوەری کۆماری ئیسلامی ئێران کە تایبەتکراوە بە لێپێچوونەوە و سزادانی توێژی مامۆستایانی ئایینی لە ئێراندا.