‎هەرێم نیوز

ئەژی ئەمین لە کۆبوونەوەی لەگەڵ نوێنەرانی كۆمەڵەی زیندانیانی سیاسی رایگەیاند، لە ئێستادا مۆدێلێك لە حیزبایەتی و حوكمڕانی هاتۆتە كایەوە ڕۆڵ و پێگەی خەباتگێڕان و گەلەكەشمان لەبەرچاو ناگیرێت و هیچ كەس لە تێكۆشەران و ڕەمزەكانی نیشتیمان ناناسێتەوە.

ئەژی ئەمین سەرۆکی ئاژانسی پاراستن و زانیاری/زانیاری لە راگەیەنراوێکدا بڵاویکردەوە، "ئەمڕۆ 24/8/2022 بەڕێز مامۆستا "ئەژی ئەمین "یاریدەدەری سەرۆكی ئەنجومەنی ئاسایشی هەرێم و سەرۆکی ئاژانسی پاراستن و زانیاری/زانیاری بە ئامادەبوونی بەڕێز حاكم والی جێگری سەرۆكی ئاژانس، پێشوازی كرد لە نوێنەرانی كۆمەڵەی زیندانیانی سیاسی".

‎هەر بەگوێرەی راگەیەنراوەکە، "سەرەڕای پێشوازی گەرم مامۆستا ئەژی باسی لە ڕۆڵی زیندانیانی سیاسی كرد لە ڕۆژانی سەختی خەباتدا بۆ ئازادی كوردستان، وە ئەوەشی خستەڕوو پێویستە سەرجەم چین و توێژەكان خزمەت بكرێن و ڕەچاوی بارودۆخ و گوزەرانیان بكرێت، هەروەها ئاماژەی بۆ ئەوە كرد لە ئێستادا مۆدێلێك لە حیزبایەتی و حوكمڕانی هاتۆتە كایەوە ڕۆڵ و پێگەی خەباتگێڕان و گەلەكەشمان لەبەرچاو ناگیرێت و هیچ كەس لە تێكۆشەران و ڕەمزەكانی نیشتیمان ناناسێتەوە، دواتریش نوێنەرانی زیندانیانی سیاسی لە كەشێكی دۆستانەدا كێشە و گرفتەكانیان و ڕێگاكانی چارەسەركردنیان خستەڕوو.