تێچووی ئاسایش و هێمنی نزیک بە نۆ هەزار کیلۆمتر سنووری خاکی و دەریایی ئێران رێژەی بودجەی بەرگری بردۆتە سەرێ ئەڵبەت ئەو ئاسایشە تەنیا بەرگری لە هاتن و رۆیشتنی نایاسایی لەو سنوورانەدا دەکات ئەگینا پرسی ئاسایشی ئەو دیو سنوورەکان و پرسی ئاسایشی ناوخۆ بابەتگەلێکی دیکەن بە بودجەی جیاوازەوە. ئێران وڵاتێکی پانوپۆرە و لە ئەگەری هەڵگیرسانی شەرێکی دەرەکییدا پارێزگاری و پاراستنی سنوورەکانی ــ لەو سەردەمەدا کە پرسی کۆچ و کۆچبەری لە لوتکەدایە
ــ زۆر دژوار و ئەستەم دەبێت. شێوازی پاراستنی سنوورەکان لە ئێراندا بە شێوازی کۆن و سەختئامێرییە و لە دنیای سایبری و دیجیتاڵی ئیمرۆدا قەت ناتوانێ بەرایی هێرشە نەرمەواڵەکان بگرێ هەر بۆیە درووستکردنی ئەو هەموو بنکە و بارەگا و بەرجەک و حەسارە کۆنکریتییەکان کەم کەڵک و بێ کاریگەرە.
بابەتێکی گرنگی دیکە کە وڵاتانی پان و بەرینی رووبەرووی ئاستەنگ کردۆتەوە و هەروەها چەمکی قوڵایی ستراتیژیکی کاڵ و کەمرەنگ کردۆتەوە پێشکەوتنی تیکنۆلۆژیای سەربازییە لە بوارەکانی درۆن و مووشەکە دوور پێوەکاندا.
لە راستییدا پێشکەوتنی تیکنۆلۆژی چەکداری هەموو هاوکێشی و باڵانسەکانی شەڕی گۆری و تەنانەت بوونی چەکە ئەتۆمی و کۆکوژەکان کە لە سەدەی رابردوودا وەک چەکی بەرەنگاری زلهێزەکان حەسابی بۆ دەکرا رووبەرووی ئاستەنگ کردۆتەوە.
کۆتا باس ئەوەیە کە وڵاتی جیهانی سێهەم بە تایبەت وڵاتانی بەرفراوان و بەربڵاو لە دنیای پێشکەوتووی ئیمرۆدا ئەگەر رووبەرووی ئاڵۆزی و شەر ببنەوە ئەوا تێچووی بەرگری و بەرپەرچدانەوەیان دەچێتە سەر و لە ئاکامی دارمانی ژێرخانی ئابوورییدا قەوارەی جوغرافیا و خاکەکەیان رووبەرووی دابەشبوون دەبێتەوە . لە راستییدا زۆربەی وڵاتانی جیهانی سێهەمی بە هۆی نەبوونی سیستەمی ئەمنی پێشکەوتوو و دیجیتاڵ و هەروەها نەبوونی ئەرتەشی مۆدێرنەوە بێگوومان لە داهاتوودا دواین سەرئەنجامیان پارچەپارچەبوونی هەرێمایەتی و جوغرافیایە.