لەبەر ئەوەی  ئێستا گۆڕەپانی خۆرهەڵاتی ناوەڕاست لە لایەن وڵاتانی بیانی بە ئەندازیاریکراون ، نموونە  فەڵەستین و لوبنان و سوریا و ئەو ئەندازیاریە عێڕاق و هەرێمی کوردستان و وڵاتانی تریش دەگرێتەوە ، بۆیە لە ئاسۆدا بۆنی گۆڕانکاری لە سیاسەتدا دێت ، گۆڕانێک لەدەرەوەدا بەسەرمان دەسەپێنرێت ، گۆڕانێک لە تەنیشتەکانەوە یان دەوروبەر دێت ، کە کاریگەریەکەی بوومەلەرزەکەی « 7 »ی ئکتۆبەرە ، «ابن خلدون» لە« مقدمە» کەیدا دەڵێت «ڕاپەڕین دژ بە دەڵەت» لە تەنیشتەکانەوە واتە ناوچە سنووریەکان دێت ، ئەوە بوو کە لە لوبنان و سوریا ڕوویدا و دەگاتە شوێنی تریش ، ئەو گۆڕانە هەموو ناوچەکە دەگرێتەوە ، چیتر جێگەی ملیشیای چەکداری و چەکداری حزبی لێنابێتەوە و چەک لە هەرێمی کوردستانیش بەدەست شەرعیەتەوە دەبێت ، ئەو گۆڕانە ناچاریە دەبێتە ئامرازێک بۆ شلەقاندنی گۆمە وەستاوەکە و ڕاچلەکاندنی بەرپرسان بۆ گەڕاندنەوەی پەیوەندیە ونبووەکەیان لەگەڵ واقع و ، بەئاگاهێنانەوەیان لەوەی کە گۆڕانکاریکردن لە خودی خۆیان زەڕوریە بۆ ڕزگارکردنی ئەو نیشتیمانەی کەوا بە بێدەنگی دەکوڕوزێتەوە و دەگری ، نیشتیمانێک مێژووەکەی تەنها قوربانیدانە کە ئەمەش نهێنی بەپێوەوەستان و مانەوەیەتی کە سەدانی وەک من و بەهێزتر و حەماسی تر بۆ گۆڕانکاری و بەئاگاهێنانەوەی گریانی ئەو میللەتە و نیشتیمان قسەیانکردووە  بەڵام بەداخەوە بە باداچووە بێ ئەوەی لەلایەن ئەهلی دەسەڵات و سیاسەت گوێیان لێبگیرێت و سەرەنجام کارەسات و ماڵوێرانی لێکەوتۆتەوە ، بۆیە پێم وایە بەتۆبزی ناچارمان دەکەن کە عەقلی کوردی وەئاگابێننەوە و وایلێبکەن پازبداتە سەرەوەی سێبەری خۆی بۆ ڕاگرتنی داچۆڕانی کوردستانی نیشتیمان و ، زەبتکردنی ڕێڕەوی سیاسی و ئابووری و گۆڕانکاریکردن ،  کە داوایەکی  میللی و جەماوەریە و ، دانانی سنوورێکە  بۆ پیسترین ڤایرۆسی کوشندە ئەویش دابەشبوونی کۆمەڵگا بەسەرخۆیدا ، کە هەموو ئامرازەکانی پەیوەندی و حیواری لەدەستداوە و ، کار گەیشتۆتە ئەوەی کە مرۆڤ حیوار لەگەڵ خۆیدا بکات تا دەگاتە پلەی شێتایەتی ، بۆیە پێم وایە ئەو گۆڕانە سەپێنراوەی لەدەرەوە دێت ئەوە ناهێڵێت کە قسەکردن بۆ لایەنێکی دیاریکراو ببێتە هەق و هەق بۆ ئەوانی تر دەستەبەر نەبێت ، هەق دەبێت بۆ هەمووان بێت ، بەداخەوە لەسەروبەندی ئەو پێشکەوتن و گۆڕانکاریە گەورانەدا تائێستا کورد کێماسیی لە ژیریی و لاوازی هۆشیاریی لەناوخۆدا هەیە ، کە ئەمە هزرێکە لەدەرەوەی سەردەمە و لەو گۆڕانکاریەی ئێستا ناوچەکە پێیدا دەڕوات جێگای نابێتەوە ، دەبێت سەرکردایەتی کوردستان  واز لە بەرژەوەندی حزبی و کەسی بێنێت و دەستپێشخەر بێت بۆ ئاشتەوایی و کۆکرنەوەی نێو ماڵ و گەڕانەوە بۆ گەل و خۆگونجاندن لەگەڵ  پێشهات دۆخە نوێیەکە و دوانەکەوتن لێی .