هەرێم نیوز
بەڕێوەبەرایەتیی پۆلیسی پارێزگای هەولێر ڕایگەیاند کە مەفرەزەکانی بەشی نەهێشتنی تاوان دوو تۆمەتباریان دەستگیر کردووە، کە بە ئەنجامدانی چەندین تاوانی جۆراوجۆر و دزینی تابلۆی ئۆتۆمبێل تۆمەتبارن.
ئەمڕۆ پێنجشەممە، 19ـی تشرینی دووەمی 2026، ڕاگەیاندنی بەڕێوەبەرایەتیی پۆلیسی پارێزگای هەولێر بڵاوی کردەوە کە نووسینگەی تاوانی باکوور دوو تۆمەتباریان بە ناوەکانی (م. ش. ی.) و (ع. ع. م.) دەستگیر کردووە، کە تابلۆی چەندین ئۆتۆمبێلیان دزیوە و تاوانیان پێ ئەنجام داوە،، هاوکات لە چەندین نووسینگە و بنکەی پۆلیسیش داواکراو بوون.
بەگوێرەی ڕاگەیەندراوەکە، لە کاتی دەستگیرکردنیاندا دەست بەسەر ئۆتۆمبێلی ژمارە ساختە و چەکی بێمۆڵەت لە جۆری دەمانچە و کڵاشینکۆف لەگەڵ بڕێک فیشەکدا گیراوە.
لە ئێستاشدا تۆمەتبارەکان ڕادەستی دادگا کراون و لە چوارچێوەی ڕێکارە یاساییەکاندا مامەڵەیان لەگەڵدا دەکرێت.