دواین هەواڵ

کوردستان‌

 19 کاتژمێر پێش ئێستا

دادگای فیدراڵیی عێراق سکاڵایەکی دیکەی لە دژی پەرلەمانی کوردستان رەتکردەوە

هەرێم نیوز

دادگای باڵای فیدراڵیی عێراق بە کۆی دەنگ سکاڵای ژمارە (٢١١/فیدراڵی/٢٠٢٦)ـی ڕەتکردەوە، کە تێیدا داوای بڕیاردان لەسەر نادەستووریبوونی بەردەوامبوونی خولی شەشەمی پەرلەمانی کوردستان کرابوو، و دادگاکە هۆکاری بڕیارەکەی بۆ نەبوونی تایبەتمەندیی دەستووری گەڕاندەوە.

بڕیاری دادگای فیدراڵی لەبارەی سکاڵاکەوە
ئەمڕۆ چوارشەممە، ١٨ی تشرینی دووەمی ٢٠٢٦، بەشی ڕاگەیاندنی دادگای باڵای فیدراڵیی عێراق ڕاگەیەندراوێکی فەرمیی بڵاو کردەوە و تێیدا ئاماژە بەوە دراوە، دادگاکە سکاڵای ژمارە (٢١١/فیدراڵی/٢٠٢٦)ـی ڕەتکردووەتەوە، کە لە ڕێکەوتی ٢٦ی تشرینی یەکەمی ٢٠٢٦ لە دژی سەرۆکی تەمەنی پەرلەمانی کوردستان تۆمار کرابوو.

دانیشتنەکەی دادگا بە سەرۆکایەتیی دادوەر مونزیر ئیبراهیم حوسێن، سەرۆکی دادگای باڵای فیدراڵی و بە ئامادەبوونی سەرجەم دادوەرەکان بەڕێوە چوو. لە دانیشتنەکەدا چاو بە سکاڵانامەکەدا خشێنرایەوە کە تێیدا سکاڵاکار داوای کردبوو بەردەوامبوونی خولی شەشەمی پەرلەمانی کوردستان بە نادەستووری بناسێنرێت و ڕێکارە یاساییەکانی دوای ئەو بڕیارە جێبەجێ بکرێن.

پاساوی دەستووریی بڕیارەکەی دادگا
بەگوێرەی ڕاگەیەندراوەکەی دادگای فیدراڵی، بەپێی بەندی (٩٣/یەکەم)ـی دەستووری ساڵی ٢٠٠٥ـی عێراق، دەسەڵاتی دادگای فیدراڵی تەنیا بۆ چاودێریکردنی ئەو یاسا و ڕێسایانەیە کە ئێستا کاریان پێ دەکرێت؛ هەر بۆیە پرسی بەردەوامبوونی خولی شەشەمی پەرلەمانی کوردستان لە سنووری تایبەتمەندی و دەسەڵاتی ئەو دادگایەدا نییە.

لە ڕاگەیەندراوەکەدا باس لەوەش کراوە، دیاریکردنی سنووری دەسەڵاتی دادگا کارێکی پەیوەست بە سیستەمی گشتییە و دادگا خۆی بڕیاری لەسەر دەدات، تەنانەت ئەگەر لایەنەکانی سکاڵاکەش باسیان نەکردبێت. بەو هۆیەشەوە سکاڵاکە ڕەت کرایەوە و بڕیارەکەش بە کۆی دەنگ دەرچووە، کە بەپێی بەندی (٩٤)ـی دەستوور بڕیارێکی بنبڕە و هەموو دەسەڵاتەکان دەبێت پێوەی پابەند بن.



Copyright © 2020 All Rights Reserved Designed And Developed By AVESTA GROUP