دواین هەواڵ

ڕاپۆرت و چاوپێکەوتن‌

 7 کاتژمێر پێش ئێستا

بە ژمارە باسی هێرشەکانی ئێران دەکات؛ ٩ هەزار درۆن و ٢ هەزار مووشەک


دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایگەیاندووە کە ئێران لە سەرەتای جەنگەوە نزیکەی ٩ هەزار درۆنی هێرشبەری و ٢ هەزار مووشەکی بالیستی تەقاندووەتەوە، بەڵام بە گوتەی ئەو، تەنها ٣ لەو هێرشانە توانیویانە بگەنە ئامانجەکانیان.

 

ترەمپ لە پەیامێکدا لە سەکۆی «تروث سۆشیال» ئاماژەی بەوە کردووە کە لە ماوەی ئەم جەنگەدا، لە نێوان ٨ هەزار تا ٩ هەزار درۆنی هێرشبەری یەک ئاڕاستەیی لەلایەن ئێرانەوە بەکارهاتوون، بەڵام تەنها دوو درۆن توانیویانە بگەنە ئامانجەکانیان و ببنە هۆی کوژرانی ژمارەیەک لە سەربازانی ئەمریکی.

 

بەپێی ئەو زانیارییانەی ترەمپ بڵاوی کردووەتەوە، هەردوو هێرشەکە لە ڕۆژی یەکەمی جەنگدا ڕوویداوە؛ یەکێکیان لە کوەیت و ئەوی دیکەشیان لە شانشینی عەرەبی سعودی ئامانجەکەی پێکاوە.

 

سەبارەت بە مووشەکە بالیستییەکانیش، ترەمپ دەڵێت ئێران نزیکەی ٢ هەزار مووشەکی تەقاندووەتەوە، بەڵام تەنها یەک مووشەک توانیویەتی بگاتە ئامانجەکەی لە ئوردن و ببێتە هۆی کوژرانی سەربازانی ئەمریکی.

 

ترەمپ لە کۆتایی پەیامەکەیدا بانگەشەی کردووە کە ڕێژەی سەرکەوتنی هێرشەکانی ئێران زۆر کەم بووە و گوتوویەتی ٩٩.٩٩٪ی مووشەک و درۆنەکانی ئێران خراونەتە خوارەوە یان نەیانتوانیوە ببنە هۆی لەدەستدانی گیانی ئەندامانی هێزە ئەمریکییەکان.

 

تێبینی: ئەم ژمارانە و هەڵسەنگاندنەکان بانگەشەی ترەمپن و لەم ڕاپۆرتەدا بە شێوەیەکی سەربەخۆ پشتڕاست نەکراونەتەوە.



Copyright © 2020 All Rights Reserved Designed And Developed By AVESTA GROUP