ھەرێم نیوز
وەزارەتی دەرەوەی چین ڕایگەیاند، ڕۆژی ١٩ی ئەم مانگە یەکەمین کۆبوونەوەی لووتکەی سێقۆڵی لە نێوان هەریەکە لە سەرۆکانی چین، ویلایەتە یەکگرتووەکانی ئەمریکا و ڕووسیا لە شاری شێنجن لە باشووری چین بەڕێوە دەچێت.
وادە و شوێنی لووتکە سێقۆڵییەکە
ئەمڕۆ دووشەممە، ١٦ی تشرینی دووەمی ٢٠٢٦، وەزارەتی دەرەوەی چین لە ڕاگەیەندراوێکی کورتدا بڵاوی کردەوە: "شی جینپینگ، سەرۆکی چین، ڕۆژی پێنجشەممە، ١٩ی تشرینی دووەم، لە شاری شێنجن کۆبوونەوەیەک ساز دەکات کە سەرکردەکانی چین، ڕووسیا و ئەمریکا کۆ دەکاتەوە، بە ئامادەبوونی هەریەکە لە ڤلادیمیر پوتن، سەرۆکی ڕووسیا و دۆناڵد ترەمپ، سەرۆکی ئەمریکا."
وەزارەتی دەرەوەی چین هیچ وردەکارییەکی زیاتری سەبارەت بە ئەجێندا و تەوەرەکانی ئەو کۆبوونەوە مێژووییە نەخستووەتە ڕوو.
کۆبوونەوەکە لە پەراوێزی لووتکەی ئەپیکدا دەبێت
پێشبینی دەکرێت ئەم کۆبوونەوە سێقۆڵییە لە پەراوێزی لووتکەی سەرکردەکانی کۆڕبەندی هاریکاریی ئابووریی ئاسیا و زەریای هێمن (ئەپیک) بەڕێوە بچێت، کە بڕیارە ڕۆژانی چوارشەممە و پێنجشەممەی داهاتوو لە چین ساز بکرێت.
ئەمەش لە کاتێکدایە کە پێشتریش هەریەکە لە کۆشکی کرملین و کۆشکی سپی ئەنجامدانی ئەو کۆبوونەوە سێقۆڵییەیان لە نێوان سەرۆکانی هەرسێ زلهێزەکەی جیهاندا پشتڕاست کردبووەوە.