هەرێم نیوز
وەزارەتی دارایی و ئابووریی حکوومەتی هەرێمی کوردستان ڕایگەیاند، زیاتر لە یەک ملیۆن مووچەخۆری کەرتی گشتی مووچەی مانگی تشرینی یەکەمی خۆیان بە شێوەی دیجیتاڵی و لە ڕێگەی پڕۆژەی "هەژماری من"یەوە وەردەگرن.
تۆمارکردنی ١.١ ملیۆن مووچەخۆر و دابەشکردنی کارتە بانکییەکان
ئەمڕۆ شەممە، ٧ی تشرینی دووەمی ٢٠٢٦، وەزارەتی دارایی و ئابووری ئاشکرای کرد، تاوەکو ئێستا زیاتر لە ١.١ ملیۆن مووچەخۆری کەرتی گشتی لە پڕۆژەی "هەژماری من"دا خۆیان تۆمار کردووە و لەو ژمارەیەش زیاتر لە ١ ملیۆن مووچەخۆر کارتی بانکیی تایبەت بە خۆیان وەرگرتووەتەوە.
پڕۆژەی "هەژماری من" لە ساڵی ٢٠٢٣دا لەلایەن مەسرور بارزانی، سەرۆکی حکوومەتی هەرێمی کوردستانەوە ڕاگەیەندرا، کە بەشێکە لە کارنامەی کابینەی نۆیەم بە مەبەستی مۆدێرنکردنی خزمەتگوزارییە بانکییەکان و بەهێزکردنی گشتگیریی دارایی لە سەرانسەری هەرێمی کوردستاندا.
دابینکردنی ٨٠٠ ئامێری (ATM) لە سەرانسەری هەرێمدا
لە چوارچێوەی هەمان پڕۆژەدا، بانکە بەشداربووەکان نزیکەی ٨٠٠ ئامێری ڕاکێشانی پارە (ATM)یان لە سەرانسەری هەرێمی کوردستان جێگیر کردووە، تاوەکو هاووڵاتییان و مووچەخۆران بە شێوەیەکی ٢٤ کاتژمێری بتوانن پارەکانیان ڕابکێشن. حکوومەتی هەرێمی کوردستان پلانی هەیە تاوەکو کۆتاییی پڕۆژەکە ژمارەی ئەو ئامێرانە لە ١،٠٠٠ ئامێر تێپەڕێنێت، کە ئەمەش کامڵانە هاوتا و گونجاوە لەگەڵ ڕێساکانی بانکی ناوەندیی عێراق.
ژمارەی سوودمەندبووان بەپێی پارێزگاکان
بەپێی زانیارییەکانی وەزارەتی دارایی، کۆی گشتیی ئەو فەرمانبەرانەی مووچەی مانگی تشرینی یەکەم بە دیجیتاڵی وەردەگرن دەگاتە ١ ملیۆن و ٣٠ هەزار مووچەخۆر. لە پارێزگای هەولێر ٤٢٤ هەزار مووچەخۆر، لە پارێزگای سلێمانی ٣٨٤ هەزار مووچەخۆر، لە پارێزگای دهۆک ١٩٧ هەزار مووچەخۆر، و لە پارێزگای هەڵەبجەش ٢٥ هەزار مووچەخۆر سوودمەند بوون.