هەرێم نیوز
جۆزێ مۆرینیۆ، ڕاهێنەری یانەی ڕیال مەدرید، بۆ یەکەم جار لە دوای گەڕانەوەی بۆ پۆستەکەی، لە یاریگای کامپ نوو ڕووبەڕووی یانەی بارسێلۆنای پێشەنگی خولەکە دەبێتەوە و هەوڵ دەدات کۆتایی بە باڵادەستیی یانە کەتەلۆنییەکە بهێنێت.
ئەمڕۆ شەممە، 24ـی 10ـی 2026، سبەی یەکشەممە لە یارییەکی گرنگی خولی ئیسپانیادا، جۆزێ مۆرینیۆ وەک ڕاهێنەری ڕیال مەدرید لە یاریگای کامپ نوو دەبێتە میوانی یانەی بارسێلۆنا. لە ماوەی یەکەمی کارکردنیدا لەگەڵ مەدرید، مۆرینیۆ توانیبووی کۆتایی بە باڵادەستیی بارسێلۆنای سەردەمی پێپ گواردیۆلا بهێنێت، هەرچەندە ئەو قۆناغە بە گرژییەکی زۆر و ململانێی تووند لە نێوان هەردوو یانەکەدا ناسرابوو.
سەبارەت بە دۆخی ئێستای هەردوو یانەکە، ڕاپۆرتە وەرزشییەکان ئاماژەیان بەوە کردووە، کە مۆرینیۆ لەم قۆناغەدا تا ڕادەیەک ئارامتر دەردەکەوێت، بەڵام هێشتا لە کاتی ڕووبەڕووبوونەوەی فشارەکاندا پەنا بۆ تاکتیکەکانی پێشووی دەبات، لەوانە دروستکردنی مشتومڕ لەسەر ناوبژیوانان بۆ کەمکردنەوەی فشار لەسەر یاریزانەکانی. لە بەرامبەردا، یانەی بارسێلۆنا لەژێر سەرپەرشتیی هانز فلیکی ڕاهێنەردا ئاستێکی زۆر سەقامگیر و بەهێز پێشکەش دەکات، و لە کۆی حەوت یاریی ڕابردوویدا بەرامبەر ڕیال مەدرید شەش بردنەوەی تۆمارکردووە.
سەرەڕای ئەوەی ڕیال مەدرید چوار یاریی ڕابردووی لە لالیگا و چامپیۆنزلیگدا بردووەتەوە، بەڵام مۆرینیۆ ڕایگەیاند، کە هەرچەندە زیاتر لە ١٠٠ ڕۆژە لە پۆستەکەیدایە، هێشتا نەگەیشتوونەتە ئەو ئاستەی کە ئەو دەیەوێت، بەڵام لە پێشووتر باشترن. هاوکات چاودێران جەخت لەوە دەکەنەوە، کە بارسێلۆنا لە ڕووی ئاستەوە لە ڕیال مەدرید سەقامگیرترە.
ململانێی نێوان مۆرینیۆ و بارسێلۆنا مێژووییەکی درێژی هەیە. مۆرینیۆ لە نەوەدەکانی سەدەی ڕابردوودا وەک یاریدەدەری ڕاهێنەر لە بارسێلۆنا کاری کردووە، بەڵام دواتر پەیوەندییەکانی لەگەڵ یانەکە و هاندەرانی بەتەواوی تێکچوو، بەتایبەتی لەو سەردەمەی کە ڕاهێنەری ڕیال مەدرید بوو (٢٠١٠ بۆ ٢٠١٣)، کە تێیدا یارییەکانی کلاسیکۆ گەیشتنە لوتکەی ئاڵۆزی و ڕووبەڕووبوونەوەی جەستەیی و دەروونی لە نێوان یاریزانان و ستافی ڕاهێنەراندا. هەر ئەوەش وایکردووە ئەم ڕووبەڕووبوونەوەیە هەمیشە جێگەی سەرنجی میدیاکان و هاندەرانی تۆپی پێ بێت لە سەرتاسەری جیهاندا.