هەرێم نیوز

شەوی ڕابردوو، سەرۆکی ئۆکراینا دووپاتی کردەوە که وڵاتەکەی ئامادەیە بە زووترین کات جەنگ لە دژی ڕووسیا ڕابگرێت و بوەستێنێت؛ ئەمەش دوا لێدوانی ئەو سەرۆکەیە که پێشتر ئامادە نەبوو شەڕ ڕابگرێت و بەو هۆیەوە کەوتە بەر ڕەخنەی سەرۆکی ئەمریکا.

دیمانەی زێلێنسکی لەگەڵ تۆرەی "ئەی بی سی" و داگیرکاریی ڕووسیا
پێگەی "عەرەبیە" ئەمڕۆ شەممە، ٢٤ی تشرینی یەکەمی ٢٠٢٦، بڵاوی کردەوە که ڤۆلۆدیمێر زێلێنسکی، سەرۆکی ئۆکراینا، دووپاتی کردەوە که وڵاتەکەی ئامادەیە بە زووترین کات جەنگەکە لە دژی ڕووسیا بوەستێنێت، ئەو جەنگەی کە ماوەی چوار ساڵە بەردەوامە و بەشێکی خاکی ئۆکراینا لە لایەن ڕووسیاوە داگیر کراوە، تا ئێستەش ڕوون نییە زێلێنسکی بۆچی لەناکاو بە وەستانی جەنگ ڕازی بووە.

سەرۆکی ئۆکراینا لە دیمانەیەکدا لەگەڵ تۆڕی "ئەی بی سی"ـی ئەمریکی گوتی: "ئۆکراینا ئامادەیە بە زووترین کات جەنگ بوەستێنێت." ناوبراو دووپاتی کردەوە که ڕووسیا ١٩٪ـی خاکی ئۆکراینای داگیر کردووە. ئەوەش لە کاتێکدایە که لە بەرەکانی جەنگدا شەڕ بەردەوامیی هەیە و هاوکات هەوڵە دیپلۆماسییەکانیش بۆ وەستانی جەنگ بەردەوامن.

بێدەنگی لە بارەی مەرجەکانی وەستانی جەنگ
هەروەها زێلێنسکی ڕوونی نەکردەوە که مەرجەکانی ئۆکراینا بۆ وەستانی جەنگ چییە، و مەرجی ئەو وڵاتە بەرامبەر بە مۆسکۆ و هەنگاوەکان بۆ وەستانی یەکجارەکیی جەنگەکە چی دەبن.