هەرێم نیوز
ڤلادیمێر پوتین، سەرۆکی ڕووسیا ڕایگەیاند کە بەپێی نوێترین توێژینەوە جینییەکان، ڕووس و ئۆکراینییەکان «یەک گەلن»، هاوکات جەختی لەوە کردەوە کە مۆسکۆ بە هیچ شێوەیەک شەڕی لەگەڵ ئۆکراینادا ناوێت، بەڵکو ئەوە دەسەڵاتدارانی ئێستای کیێڤن کە پێداگری لەسەر بەردەوامیی پێکدادانە سەربازییەکان دەکەن.
لێدوانەکانی پوتین لە میانی چاوپێکەوتنێکدا هات لەگەڵ باڤێل زاروبین، ڕۆژنامەنووسی تۆڕی «ڤێستی»ی ڕووسی، کە لە کەناڵی تێلیگرامی ناوبراودا بڵاوکرایەوە. سەرۆکی ڕووسیا ئاماژەی بەوە کرد کە ئۆکراینییەکان گەلێکی زۆر نزیکن لە ڕووسەکانەوە و دابەشبوونی سیاسیی نێوان ئەم دوو گەلە گەورەیە دەرەنجامی قۆناغە مێژووییەکان بووە، مۆسکۆش وەک واقیعێکی سەردەم ڕێز لەو ڕاستییە دەگرێت و ئامادەیە بۆ گەیشتن بە لێکتێگەیشتن لەسەر سەرجەم پرسەکان. لە هەمان کاتدا گوتی: «ئێمە شەڕمان لەگەڵ ئۆکراینادا ناوێت، بەڵام ئەگەر سەرکردایەتیی ئێستای ئۆکراینا شەڕی دەوێت، ئەوا با شەڕ بکەن».
سەرۆکی ڕووسیا ئامادەیی تەواوی وڵاتەکەی دەربڕی بۆ دەستپێکردنەوەی پەیوەندییە سێقۆڵییەکان سەبارەت بە دۆسیەی ئۆکراینا بە مەبەستی گەیشتن بە ڕێککەوتنێکی کۆتایی و بنەڕەتیی ئاشتی، نەک تەنها ئاگربەستێکی کاتی؛ بە جۆرێک ڕێککەوتنەکە گەرەنتیی تەواوی پاراستنی ئاسایشی داهاتووی هەردوو دەوڵەتی ڕووسیا و ئۆکراینا بکات. ناوبراو ئاشکراشی کرد کە مۆسکۆ لە ڕۆژانی داهاتوودا بە وردی چاودێریی بەرەوپێشچوونی دۆخەکە دەکات.
سەبارەت بە هەڵوێستی وڵاتانی ڕۆژئاوا، پوتین بە توندی ڕەخنەی لە گوتاری بەردەوامی سەرکردەکانی ئەوروپا گرت دەربارەی ئامادەکاری بۆ جەنگ لەگەڵ مۆسکۆ و ئەو جۆرە دەربڕینانەی بە «شیزۆفرینیای سیاسی» ناوبرد. ناوبراو ڕوونی کردەوە کە گەلانی ئەوروپا شەڕیان لەگەڵ ڕووسیادا ناوێت و مۆسکۆش هیچ پلانێکی بۆ هێرشکردن یان هەڵگیرساندنی شەڕ لەگەڵ دەوڵەتانی ئەوروپادا نییە.
ئەم لێدوانە گرنگانەی پوتین ڕاستەوخۆ دوای کۆبوونەوەیەکی درێژخایەن هات کە نزیکەی سێ کاتژمێری خایاند لە شاری سانت پترسبۆرگ لە نێوان ناوبراو و ستیڤ ویتکۆف، نێردەی تایبەتی ئەمریکا، کە وەک ئاماژەیەکی دیپلۆماسی بۆ تاوتوێکردنی دەروازەکانی چارەسەری سیاسی لێکدرایەوە.