هەرێم نیوز
ئیسماعیل بەقایی، وتەبێژی وەزارەتی دەرەوەی ئێران، لە کۆنگرەیەکی ڕۆژنامەوانیدا هەڵوێستی فەرمیی تارانى سەبارەت بە ئاسایشی گەرووی هورمز و بەردەوامیی دانوستانە ناڕاستەوخۆکان لەگەڵ واشنتن خستە ڕوو.
گەرووی هورمز و هەڵوێستی واشنتن
وتەبێژی وەزارەتی دەرەوەی ئێران ڕایگەیاند: "ئەمریکا بانگەشەی ئەوە دەکات گەرووی هورمز کراوەیە یان ئێمە کارتی گەرووەکەمان لە دەست داوە، بەڵام ئەمە لەگەڵ واقیعدا یەک ناگرێتەوە. ئاسایش ناگەڕێتەوە بۆ گەرووی هورمز ئەگەر گەمارۆ و شەڕی ئابووریی ئەمریکا دژی وڵاتەکەمان بەردەوام بێت."
ئاماژەی بەوەش کرد کە ئەمریکا بۆ دابینکردنی وزە ڕووی لە وڵاتانی دیکە کردووە و دۆخی ئێستای گەرووی هورمز لە ئەنجامی دەستدرێژیی ئەمریکا و ئیسرائیلە بۆ سەر ئێران، هاوکات ئەمریکا بەردەوامە لە دەربڕینی مەترسیی بێ بنەما سەبارەت بە بەرنامە ئەتۆمییەکەی ئێران.
دانوستانەکان و ڕۆڵی نێوەندگیرەکان
سەبارەت بە پرۆسەی دیپلۆماسی، بەقایی ڕوونی کردەوە کە ئاڵوگۆڕی پەیام لەگەڵ ئەمریکا لە ڕێگەی نێوەندگیرەکانەوە بەردەوامە، و بە تایبەتی پاکستان و قەتەر ڕۆڵی نێوەندگیری دەگێڕن و تاران پێشوازی لە هەوڵە باشەکانی گەلانی دۆست دەکات.
جەختیشی کردەوە: "پێداچوونەوە بە وەڵامی ئەمریکا بۆ پێشنیازەکەمان دەکەین و کاتێک گەیشتە ئەنجامێک، ناوەندەکان ئاگادار دەکەینەوە. بەڵام ئەمریکا لەم دواییانەدا سزای نوێی بەسەر ئێمەدا سەپاندووە و دەبێت ئەمانە هەڵبگیرێن."
لە کۆتاییدا ئاماژەی بەوەش دا کە تاران ئامادەیی خۆی دەربڕیوە بۆ هەوڵی چاکەکارانە بە مەبەستی یارمەتیدان لە ئاسانکاریی وتووێژەکانی نێوان یەمەن و سعوودیە.