هەرێم نیوز
عەلی زەیدی، سەرۆک وەزیرانی عێراق لە وتارێکدا لەبەردەم کۆمەڵەی گشتیی نەتەوە یەکگرتووەکان لە نیویۆرک رایگەیاند، ئەولەویەتەکانی حوکمڕانییان ئەوەیە کە دەوڵەت تاکە بڕیاردەر بێت لە بابەتی ئاشتی و شەڕدا و چەک و کەرەستەی دەسەڵات لە دەستی دامەزراوە دەستوورییەکانیدا بمێنێتەوە.

گۆڕانکاری لە پەیوەندییەکان لەگەڵ هاوپەیمانیی نێودەوڵەتی و چاکسازی
سەرۆک وەزیرانی عێراق ئاماژەی بەوە دا، لەگەڵ کۆتاییهاتنی ئەرکی هاوپەیمانیی نێودەوڵەتی لە عێراق، پەیوەندییان لەگەڵ هاوبەشە ستراتیژییەکانیان لە هاوکاریی سەربازییەوە دەگوازینەوە بۆ هاوکاریی ئابووری و گەشەپێدان، بەو جۆرەی خزمەت بە بەرژەوەندییە هاوبەشەکان بکات.
جەختیشی کردەوە کە حکومەتەکەیان شەڕی دژی گەندەڵی و پاراستنی سامانی گشتی دەکات و بەردەوامن لە چاکسازییەکان لە ڕێگەی چارەسەری بنەڕەتی و بەردەوامەوە بۆ بەرزکردنەوەی کارایی ئەدای کارکردن و باشترکردنی خزمەتگوزارییەکان. وتیشی: "ئامانجمان بنیاتنانی دەوڵەتێکی بەهێز و ئابوورییەکی هەمەچەشن و هاوچەرخە کە هاوتەریب بێت لەگەڵ گۆڕانکارییە تەکنەلۆژی و دیجیتاڵییە جیهانییەکان."

ئاسایشی وزە و ڕێڕەوە ستراتیژییەکانی هەناردەکردن
عەلی زەیدی ڕایگەیاند، بە نیگەرانییەوە لە لێکەوتەکانی پەیوەست بە ئازادیی گواستنەوە و کەشتیوانیی دەریایی دەڕوانن، کە بووەتە هۆی بەرزبوونەوەی نرخی وزەی جیهانی.
ئاشکراشی کرد کە کار دەکەن بۆ فەرەچەشنکردنی دەروازەکانی هەناردەی نەوتەکەیان و پەرەپێدانی هێڵەکانی وزە و ئەو ڕێڕەوانەی کە عێراق بە تورکیا، ئوردن و سوریاوە دەبەستێتەوە تا دەگاتە بازاڕەکانی جیهان، بە ئامانجی بەشداریکردن لە ئاسایشی وزە و هەمەچەشنکردنی ڕێگاکانی دابینکردنی.

پڕۆژەی ڕێگای گەشەپێدان و ڕاکێشانی وەبەرهێنان
لە بەشێکی دیکەی وتارەکەیدا سەرۆک وەزیرانی عێراق ڕوونی کردەوە، پڕۆژەی (ڕێگای گەشە) ڕوانگەی گشتگیری عێراقە بۆ تەواوکاری، یەکخستن و سەقامگیریی ناوچەیی، دەرگایەکی گرنگ و ڕێڕەوێکی ستراتیژییە بۆ بازرگانی، وەبەرهێنان، پیشەسازی و وزە کە ڕۆژهەڵات بە ڕۆژئاواوە دەبەستێتەوە.

ئاماژەی بەوەش کرد کە دەیانەوێت پڕۆژەی ڕێگای گەشەپێدان کراوە بێت بۆ هاوبەشی لەگەڵ هەموو دراوسێ و دۆستەکانیان، چونکە پێیان وایە بەرژەوەندییە ئابوورییەکان خۆشگوزەرانی دروست دەکەن، هاوکات بەستنەوەی وڵاتانی ناوچەکە لە ڕێگەی بەندەر، هێڵی ئاسن، بۆریی وزە، بازرگانی و وەبەرهێنانەوە خزمەت بە ئامانجێکی گەورەتر دەکات لە پاراستنی سەقامگیری.

عەلی زەیدی ئاڕاستەی پەیامەکەی بەرەو کۆمەڵگەی نێودەوڵەتی کرد و گوتی: "بە جیهان دەڵێین: لە عێراق وەبەرهێنان بکەن، عێراق خاوەنی سەرچاوە، بازاڕ، هەڵکەووتە و ئیرادەی بنیاتنانی ئابوورییەکی نوێیە."

لە کۆتاییدا جەختی کردەوە کە لەسەر بنەمای ڕێزگرتن لە سەروەری، دەستوەرنەدان، دراوسێیەتیی باش، بەهێزکردنی بەرژەوەندیی هاوبەش و دیالۆگ وەک ئامرازێک بۆ چارەسەرکردنی جیاوازییەکان، دەستیان بۆ هەمووان واڵایە.