هەرێم نیوز
ئەکرەم کەعبی، ئەمینداری گشتیی نووجەبا کە بەشێکی سەرەکی و چالاکە لە "بەرگریی ئیسلامیی لە عێراق"، هەڕەشەی پەکخستنی فڕۆکەخانەکانی کرد.
ناوبراو ناڕەزایەتی بەرامبەر سنووردارکردنی گەشتە ئاسمانییەکانی ئێران دەربڕی و داوای لە هێزە سیاسییەکان کرد کۆتایی بە "هەژموونی ئەمریکا" بهێنن تاوەکو زیانی زیاتری ئابووری و ئایینی بەر عێراق نەکەوێت.
وردودرشتی هەواڵ
ئەکرەم کەعبی، ئەمشەو لە ڕاگەیەندراوێکدا، داوای لە هێزە سیاسییەکان کرد کۆتایی بەوە بهێنن کە ئەو بە "هەژموونی ئەمریکا" ناوی دەبات. کەعبی ڕەخنەی توندی لە بێدەنگیی لایەنەکان گرت بەرامبەر ئەو بەربەستەی خراوەتە سەر گەشتە ئاسمانییەکانی نێوان عێراق و ئێران. ئەو هۆشداریی دا کە ئەگەر ئەم کێشەیە چارەسەر نەکرێت، داوا لە گەلی عێراق و خزمەتگوزارانی مەزارگە پیرۆزەکان دەکات بۆ مانگرتن لە ناو فڕۆکەخانەکان ئامادە بن.
بە وتەی کەعبی، ڕێگریکردن لە گەشتەکان بەشێکە لە گەمارۆیەکی ستەمکارانە کە جگە لە زیانی دارایی، ملیۆنان هاوڵاتی لە زیارەتی مەزارگە پیرۆزەکان بێبەش دەکات. ئەو ئاماژەی بەوە کرد کە قبووڵکردنی ئەم دۆخە لە کاتێکدا باس لە سەروەری دەکرێت، دووفاقییە و نیشانەی ئەوەیە کە ئەمریکا عێراقی وەک گوندێکی بچووک لێ کردووە کە خۆی کۆنتڕۆڵی دەکات.
لێدوانی پەیوەندیدار
ئەکرەم کەعبی ڕایگەیاند: "ئێمە زۆر چاوەڕێ ناکەین، ئەگەر گەشتەکان لەگەڵ کۆماری ئیسلامی ئاسایی نەبنەوە، داوا لە خەڵکی ئازادی عێراق و شوێنکەوتووانی حسێنی دەکەین بۆ مانگرتن لە فڕۆکەخانەکان ئامادە بن تا ئەو کاتەی ئەم بڕیارە ئەمریکییە دەشکێندرێت."
پاشخانی هەواڵ
بزووتنەوەی نووجەبا یەکێکە لە گروپە چەکدارە دیارەکانی ناو "بەرگریی ئیسلامیی لە عێراق" کە پەیوەندییەکی نزیکی لەگەڵ تاراندا هەیە. گروپەکە لە ساڵی ٢٠١٣ لەلایەن ئەکرەم کەعبییەوە دامەزراوە، باوەڕی تەواویان بە ویلایەتی فەقێ هەیە و چەک بە پیرۆز دەزانن، جگە لە عێراقیش لە سوریاش لە بەرژەوەندیی ڕژێمی ئەسەد چالاکییان هەبووە.
ئەو هەڕەشانە دوای ئەوە دێن کە وەزارەتی خەزێنەی ئەمریکا سزای نوێی بەسەر کۆمپانیا ئاسمانییەکانی ئێراندا سەپاند و بەهۆیەوە گەشتەکان بۆ زۆربەی فڕۆکەخانەکانی عێراق ڕاگیران؛ ئەمەش بووەتە هۆی دروستبوونی قەیران بۆ گەشتیارانی ئایینی کە ساڵانە بە ملیۆنان کەس لە نێوان هەردوو وڵاتدا بە مەبەستی سەردانی مەزارگە پیرۆزەکان هاتووچۆ دەکەن.