ماڵپەڕی هەواڵیی "ئاکسیۆس"ی ئەمریکی لە ڕاپۆرتێکدا ئاشکرای کرد کە دۆناڵد تڕەمپ، سەرۆکی ویلایەتە یەکگرتووەکانی ئەمریکا لە بڕیاری ئەنجامدانی هێرشی سەربازی دژ بە ئەنساروڵڵای حوسی لە یەمەن پاشەکشەی کردووە، سەرەڕای ئەوەی شازادە محەمەد بن سەلمان بە دوو پەیوەندیی تەلەفۆنیی لەسەریەک داوای دەستوەردانی بەپەلەی سەربازیی لێکردبوو. بەپێی وتەی دوو بەرپرسی ئەمریکی، تڕەمپ لە نێوان ڕازیکردنی هاوپەیمانە نزیکەکەی لە ڕیاز و خۆبەدوورگرتن لە کردنەوەی بەرەیەکی نوێی جەنگ لە یەکێک لە هەستیارترین ڕێڕەوە ئاوییەکانی ڕۆژهەڵاتی ناوەڕاستدا، بڕیاری داوە لەم کاتەدا هیچ کردەیەکی سەربازی ئەنجام نەدات.
ڕاپۆرتەکە ڕوونی دەکاتەوە کە دەسەڵاتدارانی سعودیە، بەهۆی سەختیی ڕاگرتنی پێشڕەوییەکانی حوسییەکان بەرەو کەناراوەکان و نزیکبوونەوەیان لە دەریای سوور، گوشاری زۆریان خستبووە سەر واشنتن تا گورزی ئاسمانی بوەشێنێت؛ تەنانەت ئەدمیراڵ براد کووپەر، فەرماندەی فەرماندەیی ناوەندیی ئەمریکا (سێنتکۆم) چەند بژاردەیەکی ئامادەکراوی بۆ هێرشکردن خستبووە بەردەستی وەزیری جەنگ پیت هێگسێت. سەرەڕای ئەم ئامادەکارییانەش، تڕەمپ لە کۆتایی هەفتەدا ڕێگریی لە هێرشەکان کردووە و تەنیا بە پێدانی زانیاریی هەواڵگری و داتای دیاریکردنی ئامانجەکان بە سوپای سعودیە بەسەندەی کردووە. بەرپرسانی ئەمریکی ئاماژە بەوە دەکەن کە هەڵوێستی واشنتن بەستراوەتەوە بەوەی تا چەند حوسییەکان ڕێگری لە کەشتییە نێودەوڵەتییەکان ناکەن لە باب ئەلمەندەب، بەتایبەت دوای ئەوەی دیپلۆماتکارانی ئەمریکی لە کۆبوونەوەیان لەگەڵ حوسییەکان دڵنیاییان وەرگرتووە کە گەرووەکە بە تەواوی دانەخرێت.
لە لایەکی ترەوە، ئالێکس بلیتساس، لێکۆڵەر لە ئەنجومەنی ئەتڵەسی و بەرپرسی پێشووی پێنتاگۆن شرۆڤەی کردووە کە پاشەکشەکەی تڕەمپ لە ترسی "کردنەوەی سندوقی پاندۆرا" بووە؛ بەو پێیەی هەر هێرشێکی ڕاستەوخۆ دەبێتە هۆی ئەوەی حوسییەکان دەروازەی باب ئەلمەندەب بکەنە خاڵێکی مەترسیداری خنکێنەر بۆ بازرگانی، ئەمەش دەبێتە هۆی هەڵکشانی شێتانەی نرخی نەوتی جیهانی لە کاتێکدا ئیدارەی ئەمریکا پێیوایە دەبێت سعودیە خۆی ڕووبەڕووی ئەو قەیرانە مەیدانییە بێتەوە.