هەرێم نیوز
ناودەم تەنها دەروازەی خواردن و هەناسەدان نییە، بەڵکو پەنجەرەیەکی ڕاستەوخۆیە بۆ سەر تەندروستیی تەواوی جەستە؛ پزیشکانی پسپۆڕ هۆشداری دەدەن کە دەرکەوتنی چەند نیشانەیەکی سادە لە ناودەمدا ڕەنگە زەنگی مەترسی بێت بۆ نەخۆشییە درێژخایەنەکان و تەنانەت شێرپەنجەش.
بەپێی ڕاپۆرتێکی زانستیی ڕۆژنامەی "دەیلی مەیڵ"، ئەو نیشانە سەرەکییانەی هەرگیز نابێت پشتگوێ بخرێن بریتین لە:
ئازاری ددان: نیشانەی گەیشتنی کلۆربوونە بە دەمار؛ ونبوونی لەناکاوی ئازارەکەش بە واتای چاکبوونەوە نایەت، بەڵکو مەرگی دەمارەکە و تەشەنەکردنی هەوکردنەکەیە بۆ ئێسکی شەویلگە و گیرفانەکانی لووت (جیوب).
خوێنبەربوون و ئاوسانی پووک: خوێنبەربوونی بەردەوام سروشتی نییە و لە قۆناغی پێشکەوتوودا ئێسکی ڕاگرتنی ددان دەڕزێنێت.
هاوکات زانستی پزیشکی ئەم دۆخەی بە نەخۆشییەکانی دڵ، جەڵتەی مێشک، شەکرە و لە هەندێک حاڵەتی دەگمەندا بە شێرپەنجەی خوێن بەستووەتەوە.
لەقبوونی ددان: لە مرۆڤی پێگەیشتوودا ئاماژەیە بۆ تێکچوونی ئێسکی شەویلگە، بەستەرەکان، یان دروستبوونی گرێ و کیسی مەترسیدار لە شەویلگەدا.
بۆنی ناخۆش و تامی ناوازە: بەردەوامیی بۆنی ناخۆش لەگەڵ پاککردنەوەدا پەیوەستە بە وشکبوونەوەی دەم، کۆبوونەوەی بەکتریای ژێر پووک، کێشەی گورچیلەکان، یان تێکچوونی سیستەمی بەرگری.
برینی چاکنەبووەوە و پەڵە: هەر برین، گرێ، یان پەڵەیەکی سپی و سوور لە ناودەم و سەر زمان کە زیاتر لە دوو هەفتە بمێنێتەوە، پێویستی بە پشکنینی خێرایە، چونکە یەکێکە لە نیشانە سەرەتاییەکانی شێرپەنجەی دەم.
ڕێنمایی پزیشکان بۆ خۆپارێزی:
شۆردنی ڕۆژانەی ددان بە مەعجوونی فلۆرایددار دوو جار لە ڕۆژێکدا، بەکارهێنانی داوی ددان، دوورکەوتنەوە لە جگەرەکێشان، خواردنەوەی ئاوی پێویست و سەردانی دەوریی پزیشکی ددان، گرنگترین هەنگاون بۆ دوورکەوتنەوە لەم مەترسییانە.
ئا؛ دەریا