هەرێم نیوز
وەزارەتی دەرەوەی ویلایەتە یەکگرتووەکانی ئەمریکا ڕایگەیاند، لە چوارچێوەی "ئۆپەراسیۆنی پەراوێزخستنی ئابووری"دا، سزای بەسەر بانکی "گۆڵدن گڵۆباڵ"ی تورکیادا سەپاندووە بەهۆی هاوکاریکردنی دەسەڵاتدارانی تاران لە سپیکردنەوەی پارە و دەربازبوون لە سزاکان.
پچڕاندنی تۆڕە داراییەکانی ئێران
هەینی، ٤ـی ئەیلوولی ٢٠٢٦، تۆمی پیگۆت، گوتەبێژی وەزارەتی دەرەوەی ئەمریکا لە ڕاگەیەندراوێکدا ئاشکرای کرد، سەپاندنی سزا لەلایەن وەزارەتی گەنجینەی ئەمریکاوە بەسەر بانکی "گۆڵدن گڵۆباڵ" لە تورکیا، نوێترین هەنگاوی واشنتنە بۆ پچڕاندنی ئەو تۆڕانەی کە ڕێگە بە ئێران دەدەن:
•پارە سپی بکاتەوە و سزاکان پێشێل بکات.
•هاوکاریی دارایی پێشکەشی گرووپە چەکدارەکانی بکات لە ڕۆژهەڵاتی ناوەڕاستدا.
پەیامی واشنتن بۆ دامەزراوە داراییەکانی جیهان
گوتەبێژی وەزارەتی دەرەوەی ئەمریکا جەختی لەوە کردەوە کە ئەم هەنگاوە پەیامێکی ڕوونە بۆ سەرجەم دامەزراوە داراییەکانی جیهان، کە هەر جۆرە ئاسانکارییەک بۆ مامەڵە داراییە نایاساییەکانی ئێران، سزای توندی بەدوادا دێت.
پیگۆت ئاماژەی بەوەش کرد، ئەم ڕێکارە پابەندبوونی ئیدارەی دۆناڵد ترەمپ دووپات دەکاتەوە بۆ وشککردنی ئەو سەرچاوە داراییانەی کە ئێران بۆ هەڕەشەکردن لە سەقامگیریی ناوچەکە و پەرەپێدانی توانای سەربازی بەکاریان دەهێنێت.
لە کۆتایی ڕاگەیەندراوەکەدا هاتووە کە واشنتن بەردەوام دەبێت لە بەکارهێنانی سەرجەم ئامرازە دیپلۆماسی و ئابوورییەکان بۆ گۆشەگیرکردنی ئێران، هاوکات داوا لە کۆمەڵگەی نێودەوڵەتی کراوە تاوەکو ڕێگە نەدەن هیچ بانکێک ببێتە حەشارگە و سەرچاوەی دارایی بۆ تاران.