هەرێم نیوز
سکۆت بێسێنت، وەزیری گەنجینەی ئەمریکا ڕایگەیاند، واشنتن بە تەواوی ئابووریی ئێران دەخنکێنێت و ڕێگری لە هەر جووڵەیەکی نەوتیی ئەو وڵاتە دەکات، هاوکات پێشبینی کرد لە دوای کۆتاییهاتنی قەیرانی ئێران، نرخی نەوت لە بازاڕەکانی جیهاندا داببەزێت.
پڵانی ئەمریکا بۆ خنکاندنی ئابووریی ئێران
ئەمڕۆ هەینی، ٤ی ئەیلوولی ٢٠٢٦، سکۆت بێسێنت لە بەرنامەی "وار ڕووم" سەبارەت بە هەڵوێستی وڵاتەکەی بەرامبەر تاران گوتی: "دەمەوێت ئەم دۆخە کۆتایی پێبێت. ٤٧ ساڵە ئەم دەسەڵاتە هەیە و جیهان لێیان بێزار بووە؛ دەبێت دەسەڵاتەکە لە ناوخۆوە بگۆڕدرێت یان خەڵکەکە بێنە دەست."
سەبارەت بە ڕێکارە ئابوورییەکان ڕوونی کردەوە:
•ڕێگری لە هەناردەی نەوت: لە ڕۆژی سێشەممەوە هەنگاوی کرداری بەرامبەر ڕەوانەکردنی نەوتی ئێران بۆ چین دەبێنرێت.
•گۆشەگیرکردنی تەواوەتی: گەیشتوونەتە دۆخێک کە تاران نەتوانێت هیچ کەلوپەلێک هاوردە یان هەناردە بکات.
پێشبینییەکانی بازاڕی نەوت و گەشەی ئابووری
وەزیری گەنجینەی ئەمریکا ئاماژەی بەوە کرد، دوای تێپەڕاندنی ئەم قۆناغەی ململانێ لەگەڵ ئێران، بڕێکی زۆر نەوت لە بازاڕەکاندا دەخرێتەڕوو، بەجۆرێک ڕەنگە نرخی بەرمیلێک نەوت بۆ ٤٠ یان ٥٠ دۆلار داببەزێت.
هاوکات بەراوردی ئابووریی ئەمریکای لەگەڵ کەنەدا و ئەوروپا کرد و ئاماژەی بەوە دا، لە کاتێکدا کەنەدا زیاتر لە ٤٠ هەزار هەلی کاری لەدەستداوە، ئەمریکا ئامارێکی بەرز لە ڕەخساندنی هەلی کاردا تۆمار کردووە.
هۆشداریی توند بۆ بانکە نێودەوڵەتییەکان
لە هەژماری فەرمیی خۆی لە تۆڕی کۆمەڵایەتیی ئێکس، بێسێنت هۆشداریی دا بەو دامەزراوە داراییانەی ئاسانکاری بۆ مامەڵەکانی تاران دەکەن و ڕایگەیاند: "زۆر باش دەزانین ئێوە کێن و لە کوێن. بە جێبەجێکردنی 'ئۆپەراسیۆنی پەراوێزخستنی ئابووری' سزا بەسەر سەرجەم ئەو بانکانەدا دەسەپێنین کە هاوکاریی ئێران دەکەن، تا ئەو کاتەی سەری ماری ئێرانی بە تەواوی پاندەکەینەوە."