هەرێم نیوز
ئەنجوومەنی وەزیرانی هەرێمی کوردستان، بڕیاری ڕاگرتنی پرۆسەی (لەجێگەی دانان)ـی بۆ یەک هەزار (1000) فەرمانبەر و مامۆستای وانەبێژی گرێبەست دەرکرد و داوا دەکات لەمەودوا هیچ ناوێک بۆ ئەو مەبەستە بەرز نەکرێتەوە.
بەپێی نووسراوێکی فەرمیی سەرۆکایەتیی دیوانی ئەنجوومەنی وەزیران کە ئاراستەی وەزارەتی خوێندنی باڵا و توێژینەوەی زانستی کراوە، کارکردن بە بڕگەی دووی نووسراوێکی پێشوویان ڕاگیراوە. بڕیارە نوێیەکە تایبەتە بە ڕاگرتنی پرسی لەجێگەی دانانی ئەو فەرمانبەر و مامۆستا وانەبێژانەی کە بە شێوەی گرێبەست لەسەر داهاتی ناوخۆ دامەزراون.
پێشتر بڕیار بوو نزیکەی 1000 گرێبەست لە وەزارەتی خوێندنی باڵا و توێژینەوەی زانستی کە خاوەنەکانیان دەستبەکار نەبوون، لە ڕێگەی پرۆسەیەکی شەفاف و پلاتفۆرمی ئەلیکترۆنییەوە بە سیستەمی خاڵبەندی شوێنیان پڕ بکرێتەوە.
سەرەڕای ئەوەی پێشتر ئەنجوومەنی وەزیرانی هەرێم ڕەزامەندیی لەسەر جێبەجێکردنی دابوو، بەڵام بەپێی نووسراوە نوێیەکە، بڕیارەکە هەڵوەشاوەتەوە و پرۆسەکە بەتەواوی ڕاگیراوە.