هەرێم نیوز
لە کۆبوونەوەیەکی چارەنووسسازدا، سەرۆک وەزیرانی عێراق پەیامێکی توند و ڕوونی ئاراستەی سەرجەم کوتلە سیاسی و گروپە چەکدارەکان کرد و قۆناغێکی نوێی لە ڕووبەڕوبوونەوەی گەندەڵی و کۆنترۆڵکردنی چەک لە وڵاتدا ڕاگەیاند.
هەرکەسێک سامانی گشتی بەهەدەر دابێت دەستگیردەکرێت
ئەمڕۆ دووشەممە ٢٩ی حوزەیرانی ٢٠٢٦، عەلی زەیدی، سەرۆک وەزیرانی عێراق لە کاتی پێشکەشکردنی وتارێکدا لە کۆبوونەوەی ئەنجومەنی وەزیراندا ڕایگەیاند: "حکومەتی فیدراڵی بەردەوام دەبێت لە دەستگیرکردنی سەرجەم ئەو کەسانەی تۆمەتبارن بە دزینی سامانی گشتی." سەرۆک وەزیران بە شێوازێکی بڕبڕەدار ئاماژەی بە ڕەوتی ئۆپراسیۆنە ئەمنییەکانی ئەم دواییەی بەغدا کرد و کتوپڕ هۆشدارییدا: "ئەو دەستگیرکردنانەی تا ئێستا بینراون، تەنیا قۆناغی یەکەمی پرۆسەی پاکتاوکردنی گەندەڵکارانن و چاوپۆشی لە هیچ کەسێک ناکرێت."
عەلی زەیدی جەختی لەوە کردەوە کە هێزە ئەمنییەکان بە تەواوی توانایانەوە کار دەکەن بۆ پاراستنی بەرژەوەندییە باڵاکانی هاووڵاتییانی عێراق و حکومەتەکەی لە بەرامبەر هیچ جۆرە هەڵە، کەمتەرخەمی و تاوانێکی دارایی و ئەمنیدا بێدەنگ نابێت.
کۆتاییهێنان بە چەکی دەرەوەی یاسا
لە بەشێکی دیکەی وتارەکەیدا، سەرۆک وەزیرانی عێراق پەردەی لەسەر ستراتیژیی قۆناغی داهاتووی ئەمنیی وڵات لادا و ڕوونی کردەوە، کە کاتی ئەوە هاتووە حکومەت لاپەڕەیەکی نوێ لە مێژووی حوکمرانیی عێراقدا هەڵبداتەوە. زەیدی بە توندی ڕایگەیاند: "هەوڵی تەواوەتی دەدەین بۆ ئەوەی چەک بە تەنیا لە دەستی دەوڵەتدا بمێنێتەوە." ئەم لێدوانەش وەک هۆشدارییەکی ڕاستەوخۆ بۆ ئەو گروپ و میلیشیا چەکدارانە لێکدەدرێتەوە کە لە دەرەوەی دامەزراوە فەرمییەکانی دەوڵەت چالاکی دەکەن.