هەرێم نیوز
ئەمڕۆ چوارشەممە ٢٤ی حوزەیرانی ٢٠٢٦، ئەنجوومەنی وەزیرانی هەرێمی کوردستان بە سەرپەرشتیی مەسرور بارزانی، سەرۆکی حکوومەتی هەرێمی کوردستان، کۆبوونەوەی ئاسایی خۆی ئەنجام دەدات.
بەپێی ڕاگەیەندراوی فەرمیی فەرمانگەی میدیا و زانیاری، لەم کۆبوونەوەیەدا دوو تەوەری سەرەکی و ستراتیژی کە تایبەتن بە یەکخستنی سیستمی گومرگی لەگەڵ بەغدا و پەرەپێدانی مافەکانی کرێکارانی کەرتی تایبەت، تاوتوێ دەکرێن.
تەوەری یەکەم؛ جێبەجێکردنی سیستمی دیجیتاڵیی 'ئەسیکودا' لە گومرگەکاندا
له بڕگەی یەکەمی کۆبوونەوەکەدا، پوختەی کۆنووسی هاوبەشی نێوان دەستەی گومرگی فیدراڵی و گومرگی هەرێمی کوردستان دەخرێتەڕوو، کە تایبەتە بە جێبەجێکردنی سیستمی جیهانیی و دیجیتاڵیی "ئەسیکودا" (ASYCUDA) بۆ بەڕێوەبردنی گومرگەکان، کە لە ڕێکەوتی ١٨ی حوزەیرانی ٢٠٢٦ لە شاری بەغدا واژووکراوە.
بۆ ئەم مەبەستە، ئەنجوومەنی وەزیران گشت وەزارەتە پەیوەندیدارەکان بەم بابەتەوە ڕادەسپێرێت، لەوانەش وەزارەتەکانی (دارایی و ئابووری، بازرگانی و پیشەسازی، ناوخۆ، پلاندانان، کشتوکاڵ و سەرچاوەکانی ئاو، تەندروستی) لەگەڵ دەستەی وەبەرهێنان و فەرمانگەی تەکنەلۆژیای زانیاری، تاوەکو هەماهەنگیی تەواو لەگەڵ هاوتاکانیان لە حکوومەتی فیدراڵیدا بکەن بۆ ئامادەکاریی پەسندکردنی کۆتایی ئەم پڕۆژەیە لە کۆبوونەوەی داهاتووی ئەنجوومەنی وەزاریی بۆ ئابووری، و دیاریکردنی هەنگاوەکانی داهاتوو. ئەم بابەتە لە لایەن لیژنەی تەکنیکیی حکوومەتی هەرێمەوە پێشکەش دەکرێت کە خۆیان واژووکەری کۆنووسەکە بوون و وەک میوان بەشدارن.
تەوەری دووەم؛ دیاریکردنی کەمترین مووچەی خانەنشینی بۆ کرێکاران
تەوەری دووەمی کۆبوونەوەکە تەرخان دەکرێت بۆ پرسی چاکسازییەکان لە بواری خانەنشینی و دەستەبەری کۆمەڵایەتیی کرێکاران لە هەرێمی کوردستاندا. لەم بڕگەیەدا، بڕیار لەسەر پێشنیازی فەرمیی وەزارەتی کار و کاروباری کۆمەڵایەتی دەدرێت کە تایبەتە بە دیاریکردنی کەمترین مووچەی مانگانەی خانەنشینی بۆ کرێکارانی کەرتی تایبەت بە بڕی ٥٠٠ هەزار دینار.
ئەم بڕە پارەیە بە تەواوی لە خەزێنەی خانەنشینی و دەستەبەری کۆمەڵایەتیی کرێکاران دابین دەکرێت، کە ئامانج لێی دابینکردنی ژیانێکی شایستە و پاراستنی مافی دارایی ئەو هاووڵاتییانەیە کە لە کەرتی تایبەتدا کار دەکەن. ئەم بابەتەش ڕاستەوخۆ لە لایەن وەزیری کار و کاروباری کۆمەڵایەتییەوە دەخرێتە بەردەم ئەنجوومەنی وەزیران بۆ پەسندکردن.