هەرێم نیوز
شێروان دووبەردانی، ئەندامی لیژنەی ئاسایش و بەرگری لە پەرلەمانی عێراق، ڕایگەیاند کە عەلی زەیدی، سەرۆکوەزیرانی عێراق بە نووسراوێکی فەرمی، تەواوی دڵنیایی و گەرەنتییە ئەمنییە پێویستەکانی داوەتە کۆمپانیاکانی نەوت، تاوەکو بەبێ هیچ دوودڵییەک دەست بە پرۆسەی بەرهەمهێنانی نەوت بکەنەوە.
سیستمی بەرگریی ئاسمانی بۆ پاراستنی کێڵگە نەوتییەکان
ئەم پەرلەمانتارەی عێراق ئاشکرای کرد، کە لەسەر ئاستی باڵای سەربازی هەماهەنگی و لێکتێگەیشتنی نوێ لە نێوان بەغدا و هەولێردا هەیە؛ لەم چوارچێوەیەدا بڕیار دراوە سیستەمێکی پێشکەوتووی بەرگریی ئاستبەرز لە شاری هەولێر جێگیر بکرێت، بە مەبەستی پاراستنی تەواوەتیی کێڵگە نەوتییەکان و دابینکردنی چەتری ئەمنی لە بەرامبەر هەر هەڕەشەیەکی دەرەکیدا.
دووبەردانی ئاماژەی بەوەش دا، کە مەسرور بارزانی، سەرۆکی حکوومەتی هەرێمی کوردستان، ڕەزامەندیی فەرمی و تەواوی لەسەر دانان و جێگیرکردنی ئەو سیستمی بەرگرییە ئاسمانییە دەربڕیوە، تاوەکو ژینگەیەکی ئارام بۆ کارکردنی کۆمپانیا نێودەوڵەتییەکان بێتە کایەوە.
دەستپێکردنەوەی فەرمیی گۆڕانکارییە ئابوورییەکان
لە کۆتایی لێدوانەکەیدا، ئەندامەکەی لیژنەی ئاسایش و بەرگری لە پەرلەمانی عێراق جەختی کردەوە، کە تەواوی ئامادەکارییە تەکنیکی و ئەمنییەکان کۆتاییان هاتووە و لە هەفتەی داهاتووەوە، کۆمپانیا نەوتییەکان بە شێوەیەکی فەرمی دەست بە پرۆسەی بەرهەمهێنانی نەوت دەکەنەوە، کە ئەمەش کاریگەریی ئەرێنیی ڕاستەوخۆی لەسەر بوژانەوەی کەرتی ئابووری دەبێت.