هەرێم نیوز
نیشانە مەیدانییەکان دەریدەخەن کە ڕۆڵی ڕاوێژکارانی سوپای پاسدارانی ئێران لە عێراقدا گۆڕاوە؛ پێشتر تەنیا کاریان ڕاوێژکاری و پشتگیری بوو، بەڵام ئێستا بە شێوەیەکی ڕاستەوخۆ سەرپەرشتی ئۆپەراسیۆنە سەربازییەکانی گروپە چەکدارەکان دەکەن.
تاران چیتر تەنیا بە ناردنی چەک و هاوکاری ڕازی نییە، بەڵکو لە ڕێگەی چەند تیمێکی پسپۆڕەوە، خۆی ڕاستەوخۆ بەشدارە لە جێبەجێکردنی پلانەکاندا.
ناردنی تیمە تایبەتەکان بۆ ناو ژوورە سێبەرەکان
سەرچاوەیەکی ئەمنیی عێراقی ئاشکرای کردووە کە ئەفسەرانی سوپای پاسداران ئێستا وردەکاریی هەموو هێرشەکان بەدەستەوە دەگرن، هەر لە دیاریکردنی کات و شوێنی هێرشەکە تا دەگاتە بەکارهێنانی چەکە پێشکەوتووەکانی وەک درۆن و موشەک. ئەم کارانە لە ناو شوێنێکدا دەکرێن کە پێی دەگوترێت "ژوورەکانی ئۆپەراسیۆنی سێبەر".
ئەو سەرچاوەیە کە نەیویستووە ناوی ئاشکرا بکرێت، باسی لەوە کردووە کە تەنیا دوو ڕۆژ دوای دەستپێکردنی ئاڵۆزییەکان، سوپای پاسداران دوو تیمی پسپۆڕی ناردووەتە عێراق؛ تیمی یەکەم بۆ بەڕێوەبردنی فڕۆکە بێفڕۆکەوانەکان و تیمی دووەم بۆ سەرپەرشتیکردنی سیستەمی موشەکەکان.
هەروەها تیمێکی بچووکتریش هەن کە کاریان ڕێکخستنی پەیوەندییەکان و دابینکردنی پێداویستییەکانە.
ئەم تیمانە کار دەکەن لەسەر گۆڕینی شێوازی کارکردنی گروپە چەکدارەکان؛ شوێنی نوێیان بۆ هەڵدانی موشەکەکان لە ناو شارەکاندا دروست کردووە و "ماڵی ئارام"یان وەک بنکەی کارکردن بەکار هێناوە.
هەروەها ڕێگەی نوێیان داهێناوە بۆ شاردنەوەی چەکەکان تا لە چاوی فڕۆکە سیخوڕییەکان پارێزراو بن، ئەمەش وای کردووە هێرشەکان بەردەوام بن.
گوشار بۆ سەر دامەزراوە حکومییەکان
هەر بەپێی زانیارییەکانی ئەو سەرچاوەیە، ئەفسەرانی سوپای پاسداران زۆر توڕە بوون لەو بڕیارانەی وەزارەتی ناوخۆی عێراق کە مانگی ڕابردوو دژی چەند ئەفسەرێکی ناوچەی مەدائین (باشووری بەغدا) دەریکردبوون، ئەوەش دوای ئەوەی لەو ناوچەیەوە موشەک گیرابووە بنکەکانی ئەمریکا.
ئەفسەرە ئێرانییەکان هەڕەشەی توندکردنەوەی دۆخەکەیان کردووە و پەیوەندییان بە لایەنە سیاسییە دەسەڵاتدارەکانەوە کردووە بۆ ئەوەی ڕێگری لە سزادانی ئەو ئەفسەرانە بکەن.
ئەو هێرشە ئاسمانییەی مانگی ڕابردوو کە خانووێکی لە بەغدا کردە ئامانج و بووە هۆی کوژرانی چەند ئێرانییەک (کە یەکێکیان پلەی ڕاوێژکاری هەبوو)، جارێکی تر سەرنجی خستەوە سەر ئەو تۆڕە ئێرانییانە. ئێستا دەردەکەوێت کە ئەوان تەنیا یارمەتیدەر نین، بەڵکو بەشێکی سەرەکین لە ناو دڵ و جەرگەی هێرشەکانی ئەو گروپە چەکدارانەدا.
شارەزایان دەڵێن ئەم جۆرە کارکردنەی ئێران لە عێراق، لە ئەزموونی وڵاتانی سوریا و لوبنانەوە وەرگیراوە؛ لەوێش سەرەتا وەک ڕاوێژکار دەستیان پێکرد و دواتر بوونە فەرماندەی سەرەکیی هەموو جەنگە مەیدانییەکان.
زیادبوونی کۆنترۆڵی تاران و کەمکردنەوەی ڕۆڵی ناوخۆیی
حەمید عوبەیدی، شارەزای ئەمنی، دەڵێت چیتر قسەکردن لەسەر "ڕاوێژکاری ئێرانی" مانایەکی نەماوە، چونکە ڕۆڵەکەیان گۆڕاوە بۆ شتێکی زۆر گەورەتر.
ئەو پێی وایە ئێران دەیەوێت کەمتر پشت بە سەرکردە عێراقییەکانی ئەو گروپانە ببەستێت و خۆی ڕاستەوخۆ سەرپەرشتییان بکات، هەرچەندە ئەمە مەترسیی ئاشکرابوونیشی زۆرە.
بە بڕوای عوبەیدی، ئێران ئەم ڕێگەیە بەکار دەهێنێت بۆ ئەوەی لە ڕووی سیاسییەوە تووشی کێشە نەبێت و بتوانێت بڵێت "من نیم"، بەڵام لە هەمان کاتدا دەیەوێت بە تەواوی کۆنترۆڵی بڕیارەکان بکات، بەتایبەت ئەو هێرشانەی کە بەرژەوەندییەکانی ئەمریکا یان شوێنە گرنگەکانی ناو عێراق دەکەنە ئامانج.
ئەم مۆدێلەی کارکردن وای کردووە ئێران لە ناوخۆی عێراقدا جۆرێک لە "هێزی سێبەر" دروست بکات کە لە دەرەوە وەک ڕاوێژکار دەردەکەون، بەڵام لە ناوەوە هەموو جومگە ئەمنی و سەربازییەکانی ئەو گروپانەیان بەدەستەوەیە.