هەرێم نیوز
هەرێم نیوز
ئەمڕۆ هەینی، ١٣ی ئازاری ٢٠٢٦، نێچیرڤان بارزانی سەرۆکی هەرێمی کوردستان، لە پەیوەندییەکی تەلەفۆنیدا لەگەڵ ئیمانوێل ماکرۆن سەرۆکی فەرەنسا، پرسی هێرشە تیرۆریستییەکانی سەر هەرێمی کوردستانی تاوتوێ کرد و داوای هەڵوێستی جیددی لە حکومەتی فیدراڵیی عێراق کرد.
سەرۆکی هەرێمی کوردستان بە توندی سەرکۆنەی ئەو هێرشە تیرۆریستییەی کرد کە شەوی ڕابردوو لە سنووری مەخموور کرایە سەر سەربازگەیەکی هاوبەشی پێشمەرگە و هێزەکانی فەرەنسا. لەو هێرشەدا:
• ئەفسەرێکی پلەداری فەرەنسی گیانی لەدەست دا.
• ژمارەیەکی دیکە لە سەربازانی فەرەنسا بریندار بوون.
نێچیرڤان بارزانی هاوخەمیی قووڵی خۆی و گەلی کوردستانی بۆ ماکرۆن و خێزانی ئەو سەربازە دەربڕی کە لە پێناو بەرەنگاربوونەوەی تیرۆر لە کوردستان گیانی بەخشی.
لە بەشێکی گرنگی پەیوەندییە تەلەفۆنییەکەدا، سەرۆکی هەرێمی کوردستان جەختی لە بەرپرسیارێتیی یاسایی و ئەمنیی بەغدا کردەوە و ڕایگەیاند: "پێویستە حکوومەتی عێراق ئەرکی خۆی جێبەجێ بکات بۆ ڕێگەگرتن لە هێرشی ئەو گرووپانە و سزادانیان، تاکوو چیتر بەرژەوەندییەکانی وڵات و پەیوەندییەکان لەگەڵ کۆمەڵگەی نێودەوڵەتی نەکەونە مەترسییەوە."
لای خۆیەوە، ئیمانوێل ماکرۆن سوپاسی پەیوەندی و هاوخەمیی سەرۆکی هەرێمی کرد و دووپاتی کردەوە کە وڵاتەکەی وەک هاوپەیمانێکی سەرەکی، لە پشتگیری و هاوکاریکردنی عێراق و هەرێمی کوردستان بەردەوام دەبێت لە جەنگی دژی تیرۆردا.