هەرێم نیوز
گۆڤاری ئیکۆنۆمیستی بەریتانی لە نوێترین وتاریدا باس لەوە دەکات کە ئەگەر ئارامیی دۆناڵد ترامپ بەرامبەر ئێران کۆتایی بێت، ژەنەڕاڵەکانی کۆمەڵێک بژاردەی مەترسیداریان لەبەردەستە. یەکێک لەو بژاردانە بۆردومانکردنی ڕاستەوخۆی شوێنی مانەوەی عەلی خامنەیی، ڕێبەری باڵای ئێران و کەسە نزیکەکانیەتی.
ئەزموونی ڤەنزوێلا لە ئێراندا
ئیکۆنۆمیست ئاماژە بەوە دەکات کە ڕەنگە ترەمپ هیوای بە "ئەنجامێکی هاوشێوەی ڤەنزوێلا" هەبێت. واتە لابردنی سەرکردایەتی ئێستا و هێنانی کەسایەتییەک کە زیاتر مەیلی بۆ گفتوگۆ و ئەمریکا هەبێت. دەنگۆی ئەوەش هەیە کە لە پشت پەردەوە گفتوگۆی نهێنی بۆ گەیشتن بە ئەنجامێکی لەو شێوەیە لە ئارادا بێت.
بژاردەی پێکانی سوپای پاسداران
بژاردەیەکی تری ئەمریکا بریتییە لە کردنی "سوپای پاسداران" بە ئامانج. ئەمریکا دەتوانێت وەک سزایەک بۆ سەرکوتکردنی خوێناویی خۆپیشاندەرانی مانگی ڕابردوو، هێرش بکاتە سەر بنکەکانی ئەم سوپایە کە قۆڵی سەربازیی سەرەکیی ڕژێمەکەیە.
گەورەترین کۆبوونەوەی سەربازی
ئێستا زیاتر لە یەک لەسەر سێی تەواوی کەشتییە جەنگییەکانی ئەمریکا لە ناوچەکەدان. ئەمە گەورەترین ئامادەیی سەربازیی واشنتۆنە لە دەرەوەی وڵات لە ماوەی ٢٠ ساڵی ڕابردوودا. ترەمپ سەرسامە بەوەی بۆچی ئێران سەرەڕای ئەم هەموو هێزە، هێشتا ئامادە نییە بە تەواوی تەسلیم ببێت.
مەترسیی جەنگێکی درێژخایەن
شیکەرەوەکان هۆشداری دەدەن کە هێرشی سنووردار ناتوانێت ئێران ناچار بکات ئیمتیازی گەورە بدات. لە لایەکی تریشەوە، هێرشێکی بەرفراوان بۆ گۆڕینی ڕژێم، مەترسی ئەوەی هەیە ئەمریکا کێش بکاتە ناو جەنگێکی تری درێژخایەن لە ڕۆژهەڵاتی ناوەڕاستدا.
وەڵامی ئەگەریی ئێران
ئێرانیش بێدەنگ نابێت و بژاردەکانی دیاریکردووە. ئەگەر هێرش بکرێتە سەری، ئەگەری هەیە جارێکی تر ئیسرائیل بۆردومان بکاتەوە، یان هێرش بکاتە سەر بنکەکانی ئەمریکا لە وڵاتانی کەنداو، وەک چۆن هاوینی ڕابردوو لە قەتەر ئەنجامی دا.