هەرێم نیوز
ئاژانسی هەواڵی ڕویتەرز لە ڕاپۆرتێکی شۆککەردا ئاشکرای دەکات کە ویلایەتە یەکگرتووەکانی ئەمریکا توندترین هۆشداریی داوەتە سەرکردە باڵاکانی عێراق و هەڕەشەی سەپاندنی سزای ئابووریی گشتگیر و دەستبەسەرداگرتنی داهاتە نەوتییەکانی کردووە، ئەگەر گرووپە چەکدارەکانی سەر بە ئێران لە حکومەتی داهاتوودا بەشدار بن.
عێراق بەشێکی زۆری پارەی نەوتەکەی لە بانکی یەدەگی فیدراڵیی نیویۆرک هەڵدەگرێت، ئەمەش وایکردووە واشنتن کۆنترۆڵێکی تەواوی بەسەر "دەمارە سەرەکییەکەی ژیانی عێراق"دا هەبێت. بەپێی ڕاپۆرتەکە، جۆشوا هاریس، بەرپرسی کاروباری باڵیۆزخانەی ئەمریکا لە بەغدا، ئەم پەیامە توندەی گەیاندووەتە:
• محەمەد شیاع سوودانی، سەرۆک وەزیران.
• مەسرور بارزانی، سەرۆکی حکومەتی هەرێمی کوردستان.
• عەممار حەکیم، هادی عامری و بەشێک لە سەرکردەکانی چوارچێوەی هەماهەنگی.
یەکێک لە خاڵە هەرە هەستیارەکانی فشارەکان، پرسی عەدنان فەیحانە، ئەندامی عەسائیبی ئەهلی هەق، کە وەک جێگری یەکەمی سەرۆکی پەرلەمان هەڵبژێردراوە. واشنتن بە توندی دژی ئەم پۆستەیە. ڕویتەرز دەڵێت:
• پاشەکشەی خەزعەلی: قەیس خەزعەلی، سەرۆکی عەسائیب، ئامادەیی نیشانداوە بۆ دوورخستنەوەی فەیحان، بەڵام تا ئێستا فەیحان لە پۆستەکەیدا ماوەتەوە.
• قاچاخچێتی نەوت: ئەمریکا تۆمەتی ئەوە دەخاتە پاڵ عەسائیب کە ساڵانە ١ ملیار دۆلار لە قاچاخچێتی نەوتدا بۆ ئێران و هاوپەیمانەکانی کۆدەکەنەوە.
وتەبێژی وەزارەتی دەرەوەی ئەمریکا ڕایگەیاندووە کە پشتگیریکردنی سەروەریی عێراق بەو مانایەیە کە نابێت هیچ ڕۆڵێک بۆ "میلیشیاکان" بمێنێتەوە. ئەم فشارە ئابوورییەی ئەمریکا هاوکاتە لەگەڵ دووبارە خستنەبازاڕی نەوتی ڤەنزوێلا لەلایەن واشنتنەوە، ئەمەش وەک ئاماژەیەک دەبینرێت کە ئەمریکا خۆی بۆ ئەگەری کەمبوونەوەی نەوتی عێراق یان سزادانی کەرتی وزەی ئەو وڵاتە ئامادە دەکات.