هەرێم نیوز
ویلایەتە یەکگرتووەکانی ئەمریکا لە هەوڵی بەهێزکردنی چوارچێوەی سەربازیی خۆیەتی لە رۆژهەڵاتی ناوەڕاست، چونکە گرژییەکان لەگەڵ ئێران بەهۆی خۆپیشاندانە دژەحکومەتییە فراوانەکان لە ناوخۆی ئەو وڵاتەدا توندتر بوونەتەوە.
وەزارەتی بەرگریی ئەمریکا ئێستا کەشتی فڕۆکەهەڵگری هێرشبەر لە دەریای چینی باشوورەوە بۆ ناوچەی ژێر بەرپرسیارێتیی فەرماندەیی ناوەندیی ویلایەتە یەکگرتووەکان (سێنتکۆم) لە رۆژهەڵاتی ناوەڕاست دەگوازێتەوە.
ئەم جێگۆڕکێیە لە کاتێکدایە کە دۆناڵد ترەمپ، سەرۆکی ئەمریکا، پێشتر هۆشداریی دابوو کە ئەگەر تاران هێزی کوشندە دژی خۆپیشاندەران بەکاربهێنێت، ئەوا واشنتن رەنگە پەنا بۆ کردەی سەربازی ببات.
راپۆرتەکان ئاماژە بەوە دەکەن کە کەشتیی جەنگیی "یو ئێس ئێس ئابراهام لینکن" لە چەقی ئەم گواستنەوەیەدایە و سەرکردایەتیی کەشتیگەلی هێرشبەری بەرەو ناوچەی سێنتکۆم دەکات.
گەیشتنی ئەم کەشتییە کە لەلایەن چەندین کەشتیی جەنگی و لانی کەم ژێردەریاییەکی هێرشبەرەوە پاسەوانی دەکرێت، نزیکەی هەفتەیەکی پێ دەچێت.
تاوەکو ئێستا هیچ پشتڕاستکردنەوەیەکی فەرمی لەلایەن بەرپرسانی ئەمریکاوە بڵاونەکراوەتەوە و جووڵەکە بە هیچ کردەیەکی بەپەلەی دیاریکراوەوە گرێ نەدراوە.
کەشتیی یو ئێس ئێس ئابراهام لینکن کە بەندەری سەرەکیی لە سان دیێگۆی کالیفۆرنیایە، پێنجەمین کەشتیی فڕۆکەهەڵگری پۆلی نیمیتزی هێزی دەریایی ئەمریکایە و ناوی شانزەمین سەرۆکی ئەمریکای لەسەرە.
ئەم کەشتییە بە وزەی ئەتۆمی کار دەکات و لە ریزی گەورەترین کەشتییە جەنگییەکانی جیهاندایە و بۆ چالاکیی درێژخایەنی چەندین دەیەیی و نیشاندانی هێز لە دوورییەکی زۆر لە کەناراوەکانی ئەمریکا دیزاین کراوە.
کەشتییە فڕۆکەهەڵگرەکان وەک بڕبڕەی پشتی هێزە دەریاییەکانی ئەمریکا دادەندرێن و پاڵپشتیی ئۆپەراسیۆنی ئاسمانیی بەردەوام دژی ئامانجە ئاسمانی و دەریایی و زەمینییەکان دەکات و رێگە بە ئەمریکا و هاوپەیمانەکانی دەدات بە خێرایی وەڵامی هەڕەشەکان بدەنەوە.
مەودای نزیکەیی شوێنی ئێستای کەشتیهەڵگرەکە تاوەکو کەناراوەکانی ئێران وەک بەندەر عەباس نزیکەی ٥٨٠٠ کیلۆمەترە و بە خێرایی ئێستای نزیکەی هەفتەیەکی دیکە دەگاتە دەریای عومان کە نزیکترین شوێنە لە ئێرانەوە.
ئەم ئامادەکارییانە لە کاتێکدایە کە خۆپیشاندانەکان لە ٢٨ی کانوونی یەکەمەوە دەستیان پێکردووە و بوونەتە هۆی سەرکوتێکی توندی دەسەڵاتدارانی ئێران.
گرووپی مافی مرۆڤی ئێران کە بنکەکەی لە نەرویجە رایگەیاندووە کە لانی کەم ٣٤٢٨ خۆپیشاندەر کوژراون و زیاتر لە ١٠ هەزار کەس دەستگیرکراون، لە کاتێکدا هەندێک راپۆرت مەزەندەی ژمارەی کوژراوەکان بە هەزاران کەس زیاتر دەکەن.