هەرێم نیوز
لەسەر فەرمانی مەسرور بارزانی سەرۆكی حكوومەتی هەرێمی كوردستان، كاروانی دووەمی نەخۆشانی تالاسیمیا، بۆ نەشتەرگەریی چاندنی مۆخی ئێسك ڕەوانەی دەرەوەی وڵات كران .
ئەمڕۆ چوارشەممە، وەزارەتی تەندروستی بڵاوی كردەوە، لەسەر فەرمانی مەسرور بارزانی سەرۆكی حكوومەتی هەرێمی كوردستان، كاروانی دووەم كە بریتییە لە 40 هاووڵاتیی هەرێمی كوردستان لە نەخۆشانی تالاسیمیا و بەخشەران و هاوەڵەكانیان، بۆ نەشتەرگەریی چاندنی مۆخی ئێسك، دوای پشكنین و ئامادەكارییەكانی پزیشكی و ڕێكارەكانی زانستی، لە فڕۆكەخانەی هەولێری نێودەوڵەتی لەلایەن وەزارەتی تەندروستی ڕەوانەی دەرەوەی وڵات كران.
ئاماژە بەوەش كراوە، ناردنیان بە ئەستۆگرتنی تەواوی خەرجییەكانی چوون و هاتنەوە و مانەوە و پشكنینەكان و نەشتەرگەری و چارەسەرییەكان، لەسەر بودجەی پێویستی دابین كراوە، بۆ ناردنی 140 تووشبووانی تالاسیمیا بۆ ئەنجامدانی نەشتەرگەری چاندنی مۆخی ئێسك، دوای چوونە بواری جێبەجێكردن و ناردنیان بۆ ژمارەیەك نەخۆشخانەی خاوەنی متمانەی نێودەوڵەتی JCI بە بودجەی نزیكەی 11 ملیار دینار، بۆ نەخۆشانی خاوەن بەخشەر و نەخۆشانی نەبوونی بەخشەر.
وەزیری تەندروستی لە كاتی بەڕێكردنیان، پەیامی پەرۆشی و پاڵپشتیی سەرۆكی حكوومەتی هەرێمی كوردستانی ڕاگەیاند، سوپاس و دەستخۆشی كرد بۆ ئەم پڕۆژە مرۆڤدۆستییەی حكوومەتی هەرێم، هیوای چاكبوونەوە و گەڕانەوەیان بەسەلامەتی بۆ خواستن كە ئێستە 72 هاووڵاتی لە نەخۆشخانەكاندان و لە ڕۆژانی داهاتووش كاروانی سێیەم بەڕێ دەكرێن بۆ هەمان مەبەست.