هەرێم نیوز

به‌ڕێوه‌به‌رایه‌تی گشتی ته‌ندروستی سلێمانی رایدەگەیەنێت، ڤاكسینی په‌تای وه‌رزی له‌سه‌رجه‌م مه‌ڵبه‌ندو بنكه‌ ته‌ندروستییه‌كانی سنوری پارێزگای سلێمانی به‌رده‌ست ده‌بێت و هاوڵاتیان ده‌توانن وه‌ریبگرن.

ئەمڕۆ سێشەممە، ته‌ندروستی سلێمانی له‌ڕاگه‌یه‌ندراوێكدا بڵاویكرده‌وه‌، "هاوڵاتییان ئاگادارده‌كه‌ینه‌وه‌ له‌سه‌ره‌تای هه‌فته‌ی داهاتوه‌وه‌ ڤاكسینی په‌تای وه‌رزی له‌ سه‌رجه‌م مه‌ڵبه‌نده‌ بنكه‌  ته‌ندروستییه‌كانی سنوری پارێزگای سلێمانی به‌رده‌ست ده‌بێت و ده‌توانن سه‌ردانی نزیكترین مه‌ڵبه‌ندو بنكه‌ی  ته‌ندروستی له‌خۆیانه‌وه‌ بكه‌ن بۆ به‌كارهێنان".

ئاماژه‌ی به‌وه‌شكردوه‌، ڤاكسینه‌كه‌ پێكوته‌یه‌كه‌ كارده‌كات بۆ به‌رزكردنه‌وه‌ی ئاستی به‌رگری له‌شی مرۆڤ و ڕێگری له‌ توشبون یاخود كه‌مكردنه‌وه‌ی نیشانه‌كه‌نی توشبون به‌ ڤایروسی ئه‌نفلۆنزای وه‌رزی".

ده‌شڵێت، "ئه‌و كوتانه‌ ڕێگری له‌توشبون به‌ ڤایرۆسی په‌تای وه‌رزی ده‌كات و ئه‌و كه‌سانه‌شی دوای كوتانه‌كه‌ توشی په‌تا ده‌بن به‌هۆی كاریگه‌ری ڤاكسینه‌كه‌وه‌ له‌سه‌ریان ئاسان ده‌بێت و زوتر تێیده‌په‌ڕێنن".