هەرێم نیوز
سەرچاوەیەک له حکومەتی عێراقەوە ئاشکرایکرد، کشانەوەی تەواوی هێزەکانی ئەمریکا لە بەغدای پایتەخت بەرەو هەولێر لە مانگی ئەیلولی داهاتوو دەستپێدەکات.
ئەمڕۆ یەکشەممە، سەرچاوەیەک له حکومەتی عێراق بە کەناڵی جەزیرە-ی ڕاگه‌یاندوه، "هاوپەیمانی نێودەوڵەتی لە عەین ئەسەد و فڕۆکەخانەی بەغدا و فەرماندەیی ئۆپەراسیۆنە هاوبەشەکان بەرەو هەولێر دەکشێنەوە".
ئاماژەی بەوەشکردووە: “کشانەوەی هێزەکانی هاوپەیمانان لە مانگی ئەیلوولی داهاتوودا دەبێت و ئەمەش جێبەجێکردنی ئەو ڕێککەوتنەیە کە لەنێوان بەغدا و واشنتندا کراوە”.
سەرچاوەکە ڕوونیکردەوە “ڕاهێنەرە سەربازییەکان لە وڵاتدا دەمێننەوە و مانەوەیان پەیوەندی بە کشانەوەی هێزەکانی هاوپەیمانی نێودەوڵەتییەوە نییە.”
ئەم زانیارییانە هاوتایە لەگەڵ ڕاپۆرتێکدا کە ڕۆژنامەی “العربی الجدید” و ڕۆژنامەی “الشرق الأوسط” بڵاویانکردووەتەوە، سەبارەت بەدەستپێکردنی کشانەوە و گواستنەوەی کەلوپەلی سەربازیی ئەمریکا لە بنکەی “عەین ئەسەد” لە ڕۆژئاوای عێراق، ئەمەش وەک جێبەجێکردنی ڕێککەوتنی نێوان عێراق و ئەمریکا بۆ کۆتاییهێنان بە ئەرکی هاوپەیمانی نێودەوڵەتی، کە لە ئەیلولی ٢٠٢٥ دەست پێدەکات، لە کاتێکدا هێزەکان تا ئەیلولی ٢٠٢٦ لە هەولێر و باکووری عێراق دەمێننەوە.