هەرێم نیوز
دوای بڵاوبوونەوەی دەنگۆی کشانەوەی تەواوەتیی هێزەکانی ئەمریکا لە عێراق، باڵیۆزخانەی ئەو وڵاتە لە بەغدا هەواڵەکەی ڕەتکردووە و دەڵێت، "کشانەوەی هێزەکانمان ڕاست نییە".
وتەبێژی باڵیۆزخانەی ئەمریکا لە بەغداد، لە بەیاننامەیەکدا رایگەیاندووە: ئەو هەواڵانەی ئاماژە بەوە دەکەن کە هێزەکانی ئەمریکا لە سبەینێوە بەغداد بە تەواوی چۆڵ دەکەن، نادروستن.
رونیشیکردەوە: بەپێی ئەو بەیاننامە هاوبەشەی لە 27ی ئەیلولی 2024 دەرچووە، کە خشتەیەكی کاتیی بۆ کۆتایهاتنی ئەرکی سەربازی هاوپەیمانی نێودەوڵەتی بۆ شکستپێهێنانی داعش لە عێراق راگەیاندووە، ئەرکی هێزە هاوبەشەكان– ئۆپەراسیۆنی ئیرادەی پۆڵاین لە ئێستادا بەردەوامە لە کارکردنی بەپێی ئەو کاتەی رێککەوتنی لەسەر کراوە بۆ گواستنەوەی هێزەکانی هاوپەیمانان بەرەو کۆتایی ئۆپەراسیۆنە سەربازییەکان لە عێراق.
ئاماژەی بەوەشکردووە: وەک لە بەیاننامە هاوبەشەکەدا هاتووە، ئەمە نمایندەی بەرەوپێشچوونی سروشتی ئەرکی سەربازی هاوپەیمانی دەکات لە عێراق بەرەو پەیوەندییەکی ئەمنی دوولایەنەی نەریتی تر.