هەرێم نیوز
ماڵپەڕی گڵۆباڵ سیکوریتی ڕیڤیو، کە شیکاری و ڕاپۆرتەکان لەسەر ئاسایش و جیۆپۆلەتیکی نێودەوڵەتی بڵاودەکاتەوە، لە وتارێکدا بە ئاماژەدان بەو هۆکارانەی کە کاریگەرییان لەسەر بڕیاری ئیسرائیل هەیە بۆ ئەوەی ئەگەری هەیە جارێکی دیکە هێرش بکاتە سەر ئێران، نووسیویەتی: "هێرشێکی لەو شێوەیە، کە لە پێشوو بەربڵاوترە، بە ئەگەرێکی زۆرەوە لە مانگەکانی داهاتوودا، بە تایبەت لە نێوان سێپتەمبەر و ٧ی ئۆکتۆبەردا ڕوودەدات".
ماڵپەڕەکە نووسیویەتی: "پێویستییە ستراتیژییەکانی ئیسرائیل، ئامادەکاری بەرگریی ئێران و حیساباتە سیاسییەکانی بنیامین ناتانیاهۆ، سەرۆکوەزیران، هەموو ئەم ئەگەرە بەهێزتر دەکەن."
لە بابەتەکەدا ئاماژە بەوە کراوە کە لە ڕوانگەی ئیسرائیلەوە، کاتی ئێستا دەرفەتێکە بۆ ئیستغلالکردنی درز و کەلێنە ناوخۆییەکانی ئێران.
ماڵپەڕەکە نووسیویەتی جگە لە هەوڵدان بۆ ئەوەی ئیدارەی ترەمپ پەیوەندی بە هێرشەکەوە بکات، حکومەتی ئیسرائیل یارییەکی سێگۆشەیی دیپلۆماسی لەگەڵ زلهێزەکان دەکات.
نووسیویەتی: بەپێی دوکتۆرینی سەربازی ئیسرائیل، ئەگەری ئۆپەراسیۆنێکی تێکەڵەی فرەڕەهەند زۆرە؛ هێرشێک کە پێکهاتووە لە هێرشی ئاسمانی و ئەلیکترۆنی، بە ئامانجی کوێرکردنی ڕادارەکانی ئێران و لاوازکردنی فەرماندەیی و کۆنترۆڵکردن و پووچەڵکردنەوەی مووشەکەکانی بالیستی لە هەر یەکەم کاتژمێرەکاندا.