هەرێم نیوز

تۆماس باراک، نوێنەری ئەمریکا لە سوریا ڕایگەیاند، ئیسرائیل لە دوای هێرشەکەی "٧ی ئۆکتۆبەر" تێڕوانینێکی نوێی بۆ سنوورەکان هەیە و ئەو هێڵانەی لە ڕێککەوتنی سایکس پیکۆدا کێشراون بە "بێ مانا" دەزانێت.

لە چاوپێکەوتنێکدا، باراک جەختی لەوە کردەوە کە ئیسرائیلییەکان پێیان وایە "بۆ پاراستنی خۆیان دەچنە هەر شوێنێک کە پێویست بێت"، ئاماژەی بەوەشکرد، تێڕوانینی تەلئەبیب بۆ سنوورەکان دوای هێرشەکەی حەماس لە ٧ی تشرینی یەکەمی ٢٠٢٣ گۆڕاوە.

بنیامین ناتانیاهۆ، سەرۆکوەزیرانی ئیسرائیل، چەندین جار جەختی لەسەر پلانی دروستکردنی ناوچەیەکی بێ چەکی لە باشووری سوریا، لەنێویاندا پارێزگای سوەیدا، کردووەتەوە. هێزەکانی ئیسرائیل لە مانگی کانوونی دووەمی ٢٠٢٤ەوە چەندین جار پێشڕەوییان کردووە بۆ باشووری سوریا.

لە لوبنانیش، بەرپرسانی ئیسرائیل چەندین جار ڕایانگەیاندووە، هیچ نیازێکیان نییە لە "پێنج دۆڵ" لە باشووری ئەو وڵاتە بکشێنەوە.

ئیسرائیل کاتز، وەزیری بەرگری ئیسرائیل لە مانگی نیسانەوە ڕایگەیاندووە، سوپای ئیسرائیل لەو ناوچانە دەمێنێتەوە و ئامادەیی خۆی لەو ناوچانەدا دەپارێزێت کە ناوی ناوە "ناوچە ئەمنییەکان" لە غەززە، سوریا و لوبنان، جا چ کاتیی بێت یان هەمیشەیی. لە غەززە سوپای ئیسرائیل ڕایدەگەیەنێت، زیاتر لە 75%ی کەرتەکەیان کۆنترۆڵکردووە و گەمارۆدان و داگیرکردنی شاری غەززە بەردەوامە.