هەرێم نیوز

ڕۆژی چوارشەممە، دەسەڵاتدارانی سوریا ڕێگەیان نەدا ئەو فڕۆکەیەی هەڵگری عەلی لاریجانی، سکرتێری ئەنجومەنی باڵای ئاسایشی نیشتمانی ئێران بوو، بچێتە ناو ئاسمانی سوریاوە، کاتێک لە عێراقەوە بەرەو لوبنان دەڕۆیشت.

بەشێک لە میدیاکانی تورکیا بڵاویانکردەوە، دوای ئەوەی دەسەڵاتدارانی سوریا ڕێگریان لە فڕۆکەی هەڵگری عەلی لاریجانی لە ڕێگای بەیروت بە ئاسمانی سوریادا کرد، فڕۆکەکە ناچار بوو ڕێچکەی خۆی بگۆڕێت و بە ئاسمانی تورکیادا بفڕێت.

ڕۆژنامەی تورکی تودەی نووسیویەتی، دوابەدوای ڕووخانی ڕژێمی بەشار ئەسەد لە سووریا لە مانگی کانوونی دووەمی ڕابردوو، فەرمانڕەوا نوێیەکانی دیمەشق، تێپەڕینی فڕۆکە ئێرانییەکانیان بە ئاسمانی سووریا قەدەغە کردووە.

دوای کۆتاییهاتنی ڕژێمی بەشار ئەسەد و لەکارلادانی، سووریا لە مانگی کانوونی یەکەمی ساڵی 2024ەوە سەرجەم گەشتە ئاسمانییەکانی ئێرانی لە ئاسمانی وڵاتەکەی قەدەغە کرد. ئەم سیاسەتە ڕێگاکانی پێشووی دابینکردنی بۆ حیزبوڵڵای لوبنان داخستووە و بووەتە هۆی پچڕانی تەواوەتی پەیوەندییەکانی نێوان حکومەتی ئینتقالی سوریا و تاران.

ئەمەش ئەوە نیشان دەدات کە سوریا تا چەند ڕێڕەوی سیاسی خۆی لە ژێر سەرکردایەتی ئەحمەد شەرع گۆڕیوە. لە کاتێکدا ئەسەد، سەرۆکی پێشووی سوریا، نزیکترین هاوپەیمانی عەرەبی ئێران بوو، ئێستا دیمەشق کاریگەری ئێران وەک هەڕەشەیەک بۆ سەر سەروەری و هەوڵەکانی ئاوەدانکردنەوەی وڵاتەکەی دەبینێت.