هەرێم نیوز
سەرۆكی شارەوانی سلێمانی رایدەگەیەنێت، لە شاری سلێمانی 70 هەزار فەرمانبەر رەزامەندیی ئەنجوومەنی وەزیرانیان بۆ تەرخانكردنی زەوی هەیە و ئێستاش 17 هەزار پارچە زەوی بۆ دابەشكردن بەردەستە.
لەیلا عومەر، سەرۆكی شارەوانی سلێمانی لە پرێس كۆنفرانسێكی رۆژنامەوانیدا رایگەیاند: " لە شاری سلێمانی نزیكەی 70 هەزار فەرمانبەر و كارمەندی حكوومەت بەپێی بڕیارەكەی ئەنجوومەنی وەزیرانی هەرێمی كوردستان رەزامەندییان گەڕاوەتەوە، ئێستا زۆر بە چڕی كار لە رێكارەكانی دابینكردنی زەوی دەكەین
ئاماژەی بەوەش دا: " 17 هەزار پارچە زەوی ئامادەمان بۆ دابەشكردن هەیە، داواشمانكردووە ماستەرپلانی سلێمانی بەڕوی پیرەمەگرون و عەربەتدا فراوان بكرێت و ئێستا كاری لەسەر دەكەین."
سەرۆكی شارەوانی سلێمانی جەختی كردەوە: "داوامان لە لایەنە پەیوەندیدارەكان كردوە هاوكارمان بن چونكە پرۆسەكە بەتەنیا بە سەرۆكایەتیی شارەوانی ناكرێت كۆمەڵێك فەرمانگەی پێویستە كە لە هەمانكاتدا هاوكارمانن بۆئەوەی دەست بكرێت بە دابەشكردنی زەوییەكان.