هەرێم نیوز
سەبارەت بە دواخستنی دانوستانەکانی ڕۆژی شەممە لەگەڵ ئەمریکا، عەباس عێراقچی وەزیری دەرەوەی ئێران ڕایگەیاند، کە تاران لە هەموو کاتێک زیاتر سوورە بۆ گەیشتن بە ڕێککەوتن. دەشڵێت: ئێمە لەگەڵ لایەنی عومانی و ئەمریکی، بە هۆکاری لۆجستی و تەکنیکی بڕیارماندا خولی چوارەمی دانوستانەکان دوابخەین.
عێراقچی دەڵێت: لە لایەنی ئێرانەوە هیچ گۆڕانکارییەک لە ئیرادەی ئێمە بۆ گەیشتن بە چارەسەری دانوستاندن ڕووی نەداوە.
باس لەوەش دەکات:" لەڕاستیدا ئێمە لە هەموو کاتێک زیاتر سوورین بۆ گەیشتن بە ڕێککەوتنێکی دادپەروەرانە و هاوسەنگ: ڕێککەوتنێک کە کۆتایی هاتنی سزاکانی سەر ئێران مسۆگەر بکات و متمانە دروست بکات کە بەرنامە ئەتۆمییەکەی ئێران بۆ هەمیشە بە ئاشتیانە دەمێنێتەوە، لە هەمان کاتدا دڵنیا بێت لەوەی کە مافەکانی ئێران بە تەواوی ڕێزیان لێ بگیرێت".