هەرێم نیوز
کۆمپانیای دابەشکردنی بەرهەمە نەوتییەکانی عێراق رایگەیاند، هاوردەکردنی بەنزینیان بە رێژەیەکی بەرچاو کەمکردووەتەوە.
حسێن تاڵیب، بەڕێوەبەری گشتیی کۆمپانیای دابەشکردنی بەرهەمە نەوتییەکان ڕایگەیاند، عێراق لەبەرهەمهێنانی نەوتی سپی و گازی سروشتیدا گەیشتووەتە ئاستی خۆبژێوی، لە بەرهەمی بەنزینیشدا گەیشتووەتە ئاستی نیمچە خۆبژێوی.
ئەوەشی خستەڕوو، لەئێستادا عێراق رۆژانە پێنج بۆ شەش ملیۆن لیتر بەنزین هاوردە دەکات، بەڵام پێشتر رۆژانە 12 – 15 ملیۆن لیتر بەنزین هاوردە دەکرا.
بەڕێوەبەری کۆمپانیای دابەشکردنی بەرهەمە نەوتییەکان ئاماژەی بەوەشکردووە، ئەو بەنزینەی ئێستا هاوردە دەکرێت، زیاتر لە جۆری موحەسەنە.
ڕوونیشیکردەوە، هۆکارى کەمبوونەوەی هاوردەکردنی بەنزینی بۆ باشترکردنی توانای پاڵاوگەکان و زیاترکردنی بەرهەمی رۆژانەی بەنزین گەڕاندووەتەوە