هەرێم نیوز
وەزیری دەرەوەی تورکیا ڕایگه‌یاند، وڵاتەکەی نایەوێت هیچ ڕووبەڕووبونەوەیەکی لەگەڵ ئیسرائیل لە سوریادا هەبێت.
هاکان فیدان وەزیری دەرەوەی تورکیا، ئەمڕۆ هەینی لە پەراوێزی کۆبوونەوەی وەزیرانی دەرەوەی ناتۆ لە برۆکسل، بە ئاژانسی ڕۆیتەرزی ڕاگەیاند، "کردەوەکانی ئیسرائیل لە سوریا کە ئیدارەی سەرۆک ئەحمەد شه‌رع هاوپەیمانێکی نزیکی تورکیایە ڕێگا بۆ ناسەقامگیری داهاتوی ناوچەکە خۆش دەکات".
وتیشی تورکیا نایەوێت هیچ ڕووبەڕووبونەوەیەک لەگەڵ ئیسرائیل لە سوریادا هەبێت و داواش ده‌کات هێرشه‌كان كۆتاییان پێبهێنرێت.
پێشتر وەزیری دەرەوەی ئیسرائیل ڕایگەیاندبوو، سوریا پێشتر بەوەکالەت لەلایەن ئێرانەوە بەڕێوەبراوە، نامانەوێت ببێتە پاشكۆی تورکیا.
ئەوەشی وتبوو، کە توركیا ڕۆڵێكی نەرێنی دەگێڕێت لە سوریا و لوبنان و، له تەواوی ناوچەکەو ناوچەکانی تری جیهان بەدوای ڕۆڵدا دەگەڕێت.
هەروەها وتیشی، توركیا هەڵوێستی دوژمنکارانەی هەیە بەرامبەر بە ئیدارەی خۆسەری کورد لە باکوری سوریا "ڕۆژئاوا"، هەموو هەوڵێک دەدات بۆ ئەوەی سوریا بخاتە ژێر کۆنترۆڵی خۆیەوە.