هەرێم نیوز

میدیاکانی سوریا بڵاویانکردەوە، ئیسرائیل بە فڕۆکە دوو هێرشی کردووەتە سەر دوو پێگەی سەربازی لە نزیک دیمەشقی پایتەختی سووریا.

ڕامی عەبدولڕەحمان، سەرۆکی روانگەی سووری بۆ مافەکانی مرۆڤ دەڵێت: "فڕۆکە جەنگییەکانی ئیسرائیل بۆردوومانی پێگە سەربازییەکانی ناوچەی کیسوە و موقەیلیبەیان کرد لە دەرەوەی دیمەشق."
تاوەکو ‌ئێستا زانیاریی لەسەر زیانە گیانییەکان بڵاونەکراوەتەوە.

تەلەفزیۆنی سووریاش ڕایگەیاند: "ئیسرائیل لە ناوچەکانی سەلح تەیر، سەریا سەرع، لیوای 91 و لیوای 75ـی لە نزیک شاری کیسوەی کردە ئامانج."

ئەمە لە کاتێکدایە، شەوی ڕابردوو ئیسرائیل هێرشێکی هاوشێوەی ئاسمانی و لەشکرکێشییەکی زەوینیشی کرد و بەهۆیەوە 13 کەس کوژران.

پێشتر ئیسرائیل هۆشداری دایە حکومەتی سوریا کە ئەگەر دیمەشق هەڕەشە لە بەرژەوەندییە ئەمنییەکانی تەلئەبیب بکات و "ڕێگە بە هاتنە ناوەوەی هێزەکانی دوژمنی ئیسرائیل بدات" ڕووبەڕووی "باجێکی قورس" دەبێتەوە.

ئیسرائیل کاتز، وەزیری بەرگری ئیسرائیل ڕۆژی پێنجشەممە ڕایگەیاند، سوپای وڵاتەکەی لە ناوچە پارێزراوەکانی ناوخۆی سوریا دەمێنێتەوە و هەنگاو بۆ بەرەنگاربوونەوەی هەڕەشە ئەمنییەکان دەگرێتەبەر.

وەزیری بەرگری ئیسرائیل ڕایگەیاند، هێرشە ئاسمانییەکانی شەوی ڕابردوو بۆ سەر دیمەشق و حەما پەیامێکی ڕوون و هۆشدارییەک بوو بۆ داهاتوو... ڕێگە نادەین هیچ زیانێک بە ئاسایشی ئیسرائیل بگەیەنین.

لەبەرامبەردا وەزارەتی دەرەوەی سوریا هێرشەکانی ئیسرائیلی شەرمەزار کرد و لە بەیاننامەیەکدا کە لە "X" بڵاویکردۆتەوە، هێرشەکانی بە "پێشێلکردنی ئاشکرای یاسا نێودەوڵەتییەکان" ناوبردووە.