هەرێم نیوز
بەرپرسێکی باڵای ئێران لە چاوپێکەوتنێکدا لەگەڵ ڕۆژنامەی تەلەگراف ڕایگەیاند، کۆماری ئیسلامی ئێران، بەهۆی چڕبوونەوەی هێرشە ئاسمانییەکانی ئەمریکا بۆ سەر حوسییەکان، فەرمانی کشانەوەی هێزە سەربازییەکانی لە یەمەن دەرکردووە.
بە وتەی ئەو بەرپرسە، مەبەست لەم بڕیارە ئەوەیە، پێشگیری بکرێت لە شەڕی ڕاستەوخۆی ئێران و ئەمریکا، ئەوەش لە ئەگەری کوژرانی هێزێکی ئێرانیی لە یەمەن.
ئەو بەرپرسە وتی: کۆماری ئیسلامی ئێران ستراتیژی پشتیوانی لە گرووپە بە وەکالەتەکانی ناوچەیی کەم کردووەتەوە و سەرنجی خۆی بۆ بەرەنگاربوونەوەی هەڕەشە ڕاستەوخۆکانی ئەمریکا گۆڕیوە.
ناوبراو بە تەلەگرافی بەریتانی وتووە: خەمی سەرەکی تاران ترەمپ و چۆنیەتی مامەڵەکردنە لەگەڵیدا. ئاماژەی بەوەشکردووە، "هەموو کۆبوونەوەکان لە دەوری ئەو بەڕێوەدەچن، چیتر باسی ئەو گروپە ناوچەییانە ناکرێت کە پێشتر پشتگیریان لێدەکرا".
ئەو بەرپرسە ئاشکرای کردووە: بۆچوونی زاڵ لە تاران ئەوەیە کە حوسییەکان توانای مانەوەیان نییە و لە مانگەکانی کۆتایی یان تەنانەت ڕۆژەکانیشدان، بۆیە هیچ هۆکارێک نییە بۆ ئەوەی لە لیستی پشتیوانییەکانماندا بمێننەوە. "ئەوان بەشێک بوون لە زنجیرەیەک کە پشتیان بە حەسەن نەسروڵڵا و بەشار ئەسەد بەستبوو، و هیچ مانایەکی نییە تەنها بەشێک لەم زنجیرەیە بۆ داهاتوو بهێڵرێتەوە".