هەرێم نیوز
ڕۆژنامەنووسی ئەمریکی لۆرا ڕۆزن بە پشت بەستن بە سەرچاوەیەکی ئێرانی ڕایگەیاندووە، ئەگەر ئەمریکا ڕازی بێت بە ئەنجامدانی دانوستانی ناڕاستەوخۆ لەگەڵ ئێران، ئەوا ئەم وتووێژانە دەتوانن لە ماوەی دوو بۆ سێ هەفتەی داهاتوودا ئەنجام بدرێن، بە ئەگەرێکی زۆرەوە لە وڵاتی عومان.
ئەو سەرچاوەیە کە داوایکرد ناوی ئاشکرا نەکرێت، ئاماژەی بەوەشکرد، ئەگەری ئەنجامدانی گفتوگۆی ڕاستەوخۆش هەیە ئەگەر هەردوولا لەسەر چوارچێوەیەک بۆ بەردەوامیی دانوستانەکان لە قۆناغە سەرەتاییەکاندا ڕێکبکەون.
بە وتەی ناوبراو، پێدەچێت قۆناغی یەکەمی ئەم دانوستانانە بەبێ ڕووماڵی میدیایی و دوور لە زانیاری گشتی بەڕێوەبچێت.
بە پێی ڕاپۆرتی ئەم هەواڵنێرە، تیمی دانوستاندنکاری ئێران ئەگەری هەیە بریتی دەبێت لە مەجید تەخت ڕەوانچی، جێگری وەزیری دەرەوە بۆ کاروباری سیاسی و ئەندامی سەرەکی تیمی دانوستانکاری ئەتۆمی لە ساڵی 2015 و کازم غەریبابادی، جێگری کاروباری یاسایی وەزارەتی دەرەوە.