هەرێم نیوز
ئیسرائیل ڕەتی ناکاتەوە بەڕێگای دیپلۆماسی ڕێگری لە ئێران بکرێت کە دەستی بە چەکی ئەتۆمی بگات. هەروەها وەزیری دەرەوەی ئەو وڵاتە دەڵێت، نابێت توندڕەوترین ڕژێمی جیهان دەستی بە مەترسیدارترین چەکی جیهان بگات.
گیدۆن ساعر، وەزیری دەرەوەی ئیسرائیل کە گەشتی بۆ پاریسی کردووە، ئاماژەی بە نیشانەکانی دانوستانی نێوان تاران و واشنتۆن کرد و وتی، وەک دەزانن ئێمە قسە لەگەڵ ئێرانییەکان ناکەین، بەڵام ئەوان بەڕوونی ئەوەیان ڕاگەیاندووە کە ئامادەن بۆ دانوستان ناڕاستەوخۆ لەگەڵ ئەمەریکا و ئێمەش سەرمان سوڕنابێت ئەگەر دانوستانێکی لەو شێوەیە دەست پێبکات.
گیدیۆن ساعر دوای دیدار لەگەڵ هاوتا فەرەنسییەکەی، ژان نۆئێل بارۆت، بە ڕۆژنامەنووسانی ڕاگەیاند: نابێت توندڕەوترین ڕژێمی جیهان دەستی بە مەترسیدارترین چەکی جیهان بگات. ئامانجی ڕێگریکردن لە ئێران بۆ بەدەستهێنانی چەکی ئەتۆمی، لە نێوان فەرەنسا و ئیسرائیلدا هاوبەشە".
وتیشی ئێمە شێوازی دیپلۆماسی لەگەڵ ئێران ڕەتناکەینەوە.
دوێنێ وەزیری دەرەوەی فەڕەنسا هۆشداریدا لەوەی کە دەرفەت بۆ گەیشتن بە ڕێککەوتنێکی نوێ بۆ سنووردارکردنی بەرنامە ئەتۆمییەکەی ئێران بەرتەسکە و ئەگەر ڕێککەوتن نەکرێت، ڕووبەڕووبوونەوەی سەربازی "نزیکەی حەتمی دەبێت".
سێرگی ڕیابکۆڤ، جێگری وەزیری دەرەوەی ڕووسیا ڕۆژی پێنجشەممە ڕایگەیاند، وڵاتەکەی ئامادەیە یارمەتی ئەمریکا و ئێران بدات بۆ ئەوەی بگەنە "ڕێککەوتنێکی گونجاو" پێش ئەوەی "زۆر درەنگ" بێت.
بە نامەکەی دۆناڵد ترەمپ بۆ خامنەیی و وەڵامی فەرمی ئێران بۆ ئەمریکا، ڕەنگە جارێکی دیکە تاران و واشنتۆن دانوستانی ناڕاستەوخۆ سەبارەت بە بەرنامە ئەتۆمییەکەی ئێران و سزاکانی ئەمریکا دەست پێ بکەنەوە.
هەروەها ئەکسیۆس ڕۆژی چوارشەممە بە پشتبەستن بە سەرچاوەیەک، نووسیویەتی کۆشکی سپی بە جددی بیر لە پێشنیاری ئێران دەکاتەوە بۆ دانوستانی ناڕاستەوخۆی ئەتۆمی، بەڵام لە هەمان کاتدا هێزەکانی ئەو وڵاتە لە ڕۆژهەڵاتی ناوەڕاست بە شێوەیەکی بەرچاو زیاد کراون بۆ ئەوەی ئامادەبن بۆ ئەنجامدانی هێرشی سەربازی ئەگەر دۆناڵد ترەمپ فەرمانی پێبدات.