هەرێم نیوز 

وەزیری بەرگریی ئیسرا،ئیل هۆشداری دەداتە ئەحمەد شەرع و دەڵێت، ئەگەر هێزێکی دوژمنی ئیسرائیل بێتە خاکی سوریاوە باجێکی گەورە دەدەیت.

یسرائیل کاتز، وەزیری بەرگریی ئیسرائیل لە راگەیەندراوێکدا بڵاویکردەوە، "هۆشداری دەدەمە شەرع سەرۆکی سوریا، ئەگەر رێگەبدات هێزەکانی دوژمن بێنە خاکی سووریاوە و هەڕەشە لەسەر ئاسایشی ئیسرائیل دروستبکەن، باجێکی قورس دەدەیت."

وەزیری بەرگریی ئیسرا،ئیل ئاماژەی بەوەشکردووە،  ئەو هێرشە ئاسمانییانەی لە شەوی رابردوو ئەنجامماندا پەیامێکی روونە و ئاگادارکردنەوەیە بۆ داهاتوو، رێگەنادەین هیچ زیانێک بە ئاسایشی دەوڵەتی ئیسرا،ئیل بگات."

ئەمەش لەکاتێکدایە، شەوی رابردوو، وەزارەتی دەرەوەی سووریا ڕایگەیاند، فڕۆکەکانی ئیسرائیل زیاتر لە 15 جار هێرشیان کردە سەر فڕۆکەخانەی حەما کە پێشتر بنکەیەکی ئاسمانیی سوپای سووریا بووە.

وەزارەتی دەرەوەی سووریا ئاماژەی بەوەش کردووە، "لە پێشێلکارییەکی ئاشکرای یاسا نێودەوڵەتییەکان و سەروەریی خاکی سووریای عەرەبی، هێزەکانی ئیسرائیل لە ماوەی 30 خولەکدا هێرشی ئاسمانییان بۆ سەر پێنج ناوچەی جیاواز لە سەرانسەری وڵات دەست پێکرد، لە ئەنجامدا فڕۆکەخانەی سەربازیی حەما بە تەواوی وێران بوو و دەیان هاووڵاتی مەدەنی و سەربازیش برینداربوون."