هەرێم نیوز
رۆژنامەی "واشنتۆن پۆست" لە راپۆرتێکدا ئاشکرایکردووە، ئەگەری زۆرە ئەمریکا و ئیسرائیل لە نیوەی یەکەمی ئەمساڵدا، کەمتر لە سێ مانگی داهاتوو، هێرشی سەربازی بۆ سەر ئێران ئەنجام بدەن.
رۆژنامەکە ئاماژەی بەوەکردووە، حکومەتەکەی بنیامین ناتانیاهۆ، خواستی خۆی دەربڕیوە بۆ بەشداریكردن لە هێرشەکەی سەر ئێران بكات.
بەگوێرەی واشنتۆن پۆست، هەواڵگری ئەمریکا پێشبینی كردووە، لە نیوەی یەکەمی ئەمساڵدا هێرشە سەربازییەكە ئەنجام بدرێت.
سەرچاوە سەربازییەکانی ئەمریکا جەختیان لەو هەواڵانە كردووتەوە، کە باس لە جێگیرکردنی تیمێك لە فڕۆکەی تارمایی بۆمبهاوێژی جۆری بی-٢ دەكەن، لە بنكەی دیێگۆ گارسیا، كە بنکەیەکی دەریاییە لە دوورگەیەکى لە زەریای هیندی.
فڕۆکەی بی-٢ دەتوانێت زۆرترین بڕی تەقەمەنی هەڵبگرێت كە توانای خاپوركردنی پێگە زۆر توندوتۆڵەكانی هەیەو، پێدەچێت توانای تێكشكاندنی دامەزراوە ئەتۆمییە ژێرزەمینییەکانی ئێرانی هەبێت، وێڕای ئەوەی ئەو فرۆكانە توانای هاویشتتنی موشەكی زۆر وردو ئاڕاستەكراویان هەیە لەگەڵ چەكی ئەتۆمی.
لەلایەكی ترەوە، رۆژنامەی دەیلی مەیلی بەریتانی بڵاویكردووەتەوە، هاوکات لەگەڵ هەڵكشانی بەردەوامی قسە و لێدوانی نێوان ئەمریکا و ئێران، بەرپرسانی ئەمریکا و ئیسرائیل باسیان لە ئەگەری بە ئامانجگرتنی ئێران کردووە لە هەفتەکانی داهاتوودا.
ئەو بەرپرسانە بە رۆژنامەكەيان راگەیاندووە، واشنتۆن و ئیسرائیل پلانیان هەیە بۆ هەڵكشانێكی نزیك کە پلانی بۆ دادەڕێژن، رەنگە بگاتە ئاستی گورزێكی گەورە دژی تاران.
ئەم هەڵکشانە، بە وتەی بەرپرسان، لە چەند هەفتەی داهاتوودا رودەدات و ئامانجەکەش، دامەزراوە ئەتۆمییەکانی ئێران دەبێت لە رێگەی هێرشی ئاسمانی فراوانەوە.