هەرێم نیوز
حكومەتی ئەڵمانیا بە هەماهەنگی لەگەڵ ئیسرائیل، ژمارەیەكی زۆر هاووڵاتی خۆی لە كەرتی غەززە دەگوازێتەوە بۆ ئەڵمانیا.
كاترین دیسشاویر، وتەبێژی وەزارەتی دەروەی ئەڵمانیا لە لێدوانێكی رۆژنامەوانیدا رایگەیاند، 19 هاووڵاتیی كەرتی غەززە كە هەڵگری رەگەزنامەی ئەڵمانین، لەگەڵ 14 كەس لە كەسوكاریان، لەڕێگەی دەرازەی كەرەم ئەبوسالم-ی ئیسرائیل، گواسترانەوە بۆ ئەڵمانیا.

باسی لەوەشکرد:" گواستنەوەی ئەو هاووڵاتییانە كە بە فڕۆكەیەكی تایبەت لە فڕۆكەخانەی شاری لایپزیگ نیشتنەوە، لەچوارچێوەی هەوڵەكانی حكومەتی بەرلین دێت بۆ گواستنەوەی سەرجەم ئەم هاووڵاتییانەی كە هەڵگری رەگەزنامەی ئەڵمانیان و نیشتەجێی كەرتی غەززەن".

وتەبێژی وەزارەتی دەروەی ئەڵمانیا ئەوەشی خستەڕوو، گواستنەوەی هاووڵاتییەكانیان لە غەززەوە بۆ ئەڵمانیا، بە هاوكاری حكومەتی ئیسرائیل بووە، كە لەوبارەیەوە ئاسانكاریی زۆری كردووە.

هەفتەی رابردووش، 70 هاووڵاتی نیشتەجێی كەرتی غەززە كە هەڵگری رەگەزنامەی وڵاتانی ئەوروپان، لەڕێگەی فڕۆكەخانەی رامون-ی باشووری ئیسرائیلەوە بە فڕۆكەیەكی سەربازیی بەرەو ئەوروپا كۆچیان كرد، ئەمەش جگە لە كۆچكردنی سەدان خێزانی دیكەی كەرتی غەززە بۆ هەریەك لە میسر و ئوردن بەبیانووی وەرگرتنی چارەسەری پزیشكی، حكومەتی ئیسرائیلیش رایگەیاندبوو ئەوپەڕی ئاسانكاریی بۆ هاووڵاتیانی فەلەستینی دەكەن كە بەشێوەیەكی ئارەزوومەندانە دەیانەوێ كەرتی غەززە جێبهێڵن و روو لە وڵاتانی تر بكەن.

كۆچكردنی ئەو هاووڵاتییانەی كەرتی غەززە هاوكاتە لەگەڵ دەستپێكردنی لەشكركێشییەكی گەورەی سوپای ئیسرائیل بۆسەر كەرتی غەززە، بەئامانجی داگیركردنی بەشێك لە خاكی ئەو ناوچەیە و لكاندنی بە خاكی ئیسرائیلەوە.

پێشتریش، وەزیری بەرگریی ئیسرائیل رایگەیاندبوو، وڵاتەكەی بەهەموو شێوەیەك كاردەكات بۆ جێبەجێكردنی پلانەكەی دۆناڵد ترەمپ سەرۆكی ئەمریكا بۆ چۆڵكردنی كەرتی غەززە لە دانیشتووانەكەی و كۆچپێكردنیان بۆ وڵاتانی تر، بۆ ئەو مەبەستەش دەستپێشخەرییەكی راگەیاندووە بۆ هاوكاریكردنی هەر كەسێكی دانیشتووی غەززە كە بەشێوەیەكی ئارەزوومەندانە كۆچ بكات بۆ وڵاتێكی تر.