هەرێم نیوز

چاوەڕواندەکرێت لەچەند رۆژى داهاتوودا محەمەد شیاع سودانى سەرۆک وەزیرانى عێراق سەردانى تورکیا بکات، رەجەب تەیب ئەردۆغان سەرۆک کۆمارى تورکیاش لە دوو مانگى داهاتوودا بگاتە بەغداد، بۆ تاوتوێکردنى چەندین پرس لەسەرووى هەموویانەوە رێگەى گەشەپێدان.

عەبدولقادر ئۆغڵو وەزیرى گواستنەوەى تورکیا ئەمڕۆ چوارشەممە رایگەیاند، لەچەند رۆژى داهاتوودا سەرۆک وەزیرانى عێراق سەردانى تورکیا دەکات و رەجەب تەیب ئەردۆغانیش لە نیوەى یەکەمى ئەمساڵدا سەردانى عێراق دەکات.

ئاماژەی بەوەشدا، ڕەجەب تەیب ئەردۆغان سەرۆك كۆماری توركیا، لە ماوەی دوو مانگی داهاتوودا سەردانی عێراق دەكات و تاوتوێی چەند پرسێك دەكەن، دیارترینیان پڕۆژەی ڕێگەی گەشەپێدانە كە ئورالئۆغڵو ڕای گەیاندووە، گەیشتووەتە قۆناغی پێشكەوتوو.

وەزیری گواستنەوەی توركیا دەشڵێت، قۆناغێكی بەرچاو لە پڕۆژەی ڕێگیی گەشەپێدان بەدی هاتووە، كە توركیا بە بەندەری فاو لە كەنداوی عەرەبی لە ڕێگەی هێڵی ئاسنین و ڕێگەی خێرای 1200 كیلۆمەتریی دەبەستێتەوە.

وتیشی: ئەگەری چالاككردنی كەرتی تایبەت هەیە لەبارەی لایەنی دارایی ڕێگەی گەشەپێدان، هەروەها پاڵپشتی دارایی لە قەتەر و ئیمارات و دامەزراوە داراییە نێودەوڵەتییەكان دەبێت.

وەزیری گواستنەوە ڕاشیگەیاند، "محەمەد شیاع سوودانی لە چەند ڕۆژی داهاتوودا سەردانی وڵاتەكەمان دەكات. هەرچەندە وادەی سەردانەكە یەكلا نەكراوەتەوە، بەڵام ڕەجەب تەیب ئەردۆغان سەرۆك كۆمار بەهەمانشێوە بەنیازە لە دوو مانگی داهاتوودا سەردانی عێراق بكات، پێشبینیش دەكەین ئەو بڕیارانەی لەم سەردانانەدا دەدرێن، پێوەست بن بە ڕێككەوتنەكانی پێشووەوە."

ئەگەر ئەردۆغان لە ماوەی دوو مانگی داهاتوودا سەردانی عێراق بکات، ئەوە دەبێتە دووەم سەردانی ئەو سەرۆککۆمارەی تورکیا لە ماوەی ساڵێکدا بۆ عێراق، هەروەها سەردانەکەی ساڵی ڕابردووی ئەردۆغان، یەکەم سەردانی بوو بۆ عێراق لە ماوەی 10 ساڵی ڕابردوودا.

پڕۆژەی ڕێگەی گەشەپێدان، رێگەی وشکانی و ئاسنین لە خۆدەگرێت کە بەندەری فاو لە کەنداوی بەسرەى باشووری عێراق بە درێژایی ھەزار و 200 کیلۆمەتر بە تورکیا و دواتر ئەوروپا دەبەستێتەوە.

درێژی هێڵی ئاسنینەکە هەزار و 175 کیلۆمەتر و وشکانییەکەش هەزار و 190 کیلۆمەترە، کە بە 11 پارێزگای عێراقدا تێدەپەڕێت. هەردوو ڕێگەکە هاوتەریب دروستدەکرێن و یەکتر نابڕن، تەنیا لە باکوری پارێزگای کەربەلا دەگەنەوە بە یەک.

گوژمەی پرۆژەکە 17 ملیار دۆلارە و بڕیارە لە 2050 کۆتایی پێبێت.