هەرێم نیوز
گوتەبێژی کۆشکی سپی رایدەگەیەنێت، هێزەکانی ئەمەریکا نزیکەی 200 هێرشیان کردووتە سەر بنکە و حەشارگەی چەکدارانی حووسی، ئەمەش تواناکانی ئێرانی لەو ناوچەکە لاواز کردووە.
کاڕۆلین لیڤیت، گوتەبێژی کۆشکی سپی لە کۆنگرەیەکی ڕۆژنامەوانیدا ڕایگەیاند، هێرشە یەکلا کەرەوەکانی ئەمەریکا بۆ سەر حووسییەکانی کاریگەرییەکی زۆری هەبووە لەسەر لاوازکردنی توانا و هەژموونی ئێران لە ناوچەکە.
ئاماژەی بەوەشدا، لە هێرشەکاندا ژمارەیەک سەرکردە و ئەندامانی باڵا و کاریگەریی ئەو چەکدارانە کوژراون، جەختیشی کردەوە، هێزەکانی ئەمەریکا تا ئەو کاتەی ئاشتی و سەقامگیری بۆ ناوچەکە دەگەڕێننەوە، لە هێرشەکانیان بەردەوام دەبن.
هەروەها رۆژی دووشه‌ممه، دۆناڵد تره‌مپ، سه‌رۆكی ئه‌مه‌ریكا ڕایگه‌یاند، هێرشەکانیان بۆ سەر چەکدارە حووسییەکانی یەمەن چڕ دەکەنەوە و شه‌و و ڕۆژ لە بۆمبارانکردنی بنکە و بارەگای چەکدارەکان بەردەوام دەبن؛ وتیشی: حووسییه‌كان هێشتا ئازاره به ئێشه‌كه‌یان نە چەشتووە.
لە کاتێکدا ئۆپەراسیۆنی سەربازیی ئەمریکا دژی حو,سییەکان لە یەمەن بەردەوامە، میدیاکانی سەر بە ئێران ئێوارەی سێشەممە، 2ی نیسانی 2025 ڕایانگەیاند: هێرشە ئاسمانییەکانی ئەمریکا شاری حەدیدە لە ڕۆژئاوای یەمەن و سەعدەیان لە باکووری یەمەن كردووەتە ئامانج.
هەروەها هەواڵی بۆردومانی ئەمریکا بۆ سەر شاری مەنسوورییە لە ڕۆژهەڵاتی حەدیدە و هەڵکوتانە سەر شوێنەکانی دوورگەی کەمران لە دەریای حەدیدە بڵاو بووەوە.
میدیاکانی حوسییەکان دوو هێرشی ئاسمانیی ئەمریکایان بۆ سەر شوێنەکانی ڕۆژهەڵاتی شاری سەعدە بڵاو کردەوە.
كەناڵی (ئەلحەدەس) ڕاپۆرتی بڵاو كردووەتەوە، ئەمریكا بە بۆمبی زۆر بەهێز پێگەکانی حووسییەکانی لە حەدیدە و سەعدە كردووەتە ئامانج.
هەروەها ئاماژەی بەوەش کردووە، هەڵمەتەکانی ئەمریکا کەمپێکی مەشقی حوسییەکانیان کردووەتە ئامانج لە شاری مەشرافە لە قەزای وەساب.
چەند هەفتەیەكە هێرشەكانی ئەمریكا بۆ سەر حووسییەكانی یەمەن زیاتر بووە و دۆناڵد ترەمپ، سەرۆكی ویلایەتە یەكگرتووەكانی ئەمریكا ڕایگەیاندووە: تاكوو حووسییەكان دەست لە هێرشكردن لە دەریای سوور هەڵنەگرن، هێرشەكانمان ناوەستن.