هەرێم نیوز

وەزارەتی بەرگریی ئەمریکا ڕایدەگەیەنێت، فڕۆکەی جەنگیی زیاتریان رەوانەی رۆژهەڵاتی نێوەڕاست کردووە. گوتەبێژی وەزارەتەکەش ئاماژە بەوە دەکات؛ پابەندن بە ئاسایشی ناوچەکەوە. 

كەناڵی (سكاینیوز)ی لە زاری گوتەبێژی وەزارەتی بەرگریی ئەمریكا، شۆن بارنێل ـەوە بڵاوی كردووەتەوە، "کەشتی فڕۆکەهەڵگریی (کارل ڤینسۆن) دەچێتە ڕیزی کەشتیی فڕۆکەهەڵگری (هاری ئێس ترومان)ـەوە لە ڕۆژهەڵاتی ناوەڕاست، بۆ ئەوەی بەردەوام بێت لە پێشخستنی سەقامگیریی ناوچەکە و ڕێگریکردن لە شەڕانگێزی و پاراستنی ئازادیی جموجۆڵی بازرگانی لە ناوچەکەدا."

وەزارەتەکە لە بەیاننامەیەکدا ئاماژەی بەوە کردووە، وەزیر پیت هێگسێس، فەرمانی بڵاوەپێکردنی فڕۆکە جەنگییەکانی دەر کردووە.

بەگوێرەی ئاژانسی (ڕۆیتەرز) بەرپرسانی ئەمەریکا کە نەیانویستووە ناویان ئاشکرا بکرێت، ڕایانگەیاندووە، لانیکەم چوار فڕۆکەی بۆمبیی (بی 2) گواستراونەتەوە بۆ بنکەیەکی سەربازیی ئەمریکا و بەریتانیا لە دوورگەی دیێگۆ گارسیای زەریای هیندی.

شارەزایان دەڵێن: فڕۆکەی B-2 کە 'شەبەح'یشی پێدەڵێن، خاوەنی تەکنەلۆژیای خۆدزینەوەیە لە ڕادار و قورسترین بۆمب و چەکی ئەتۆمی هەڵدەگرێت، بۆیە هێنراوەتە ئەو بنکەیە تاوەکوو بتوانێت لە ڕۆژهەڵاتی ناوەڕاست کاری پێبکرێت.

بڕیارە بەم نزیکانە کەشتیگەلی جەنگی فڕۆکە هەڵگری کارل ڤینسۆن دوای تەواوکردنی مانۆڕەکانی لە ئۆقیانووسی ئارام، بچێتە پاڵ فەرماندەیی ناوەندی هێزەکانی ئەمەریکا (سێنتکۆم) بۆ بەردەوامبوون لە هەوڵەکانی سەقامگیرکردنی ئاسایشی ڕۆژهەڵاتی ناوەڕاست و بەرپەرچدانەوەی هێرشی حووسییەکان بۆ ئازادی بازرگانی دەریایی.

هەروەها فڕۆکە هەڵگری نمیتز لە ڕۆژئاوای ئۆقیانووسی ئارام دەستیکردووە بە ئەرکی پاراستنی هێزەکانی ئەمەریکا لە باشووری چینەوە تاوەکوو دەگاتە ڕۆژهەڵاتی ناوەڕاست.

سەرەتای ئەم هەفتەیە سەرۆکی ئەمەریکا هەڕەشەی لە ئێران کرد بەوەی ئەگەر لەسەر پرسی ئەتۆمی دانووستان نەکات، ئەوە ڕەنگە نژاردەی سەربازی بەکار بهێنێت.
هێزی ئاسمانی ئەمەریکا 20 فڕۆکەی بۆمبڕێژکراوی B-2 هەیە، بۆیە بە شێوەیەکی گشتی زۆر بەکارناهێنرێن.